ԵՐԵՎԱՆ, 10 սեպտեմբերի – Sputnik. 2022թ–ի ընթացքում Հայաստան տեղափոխված ավելի քան 2000 ՌԴ քաղաքացի կացության քարտ է ստացել workpermit.am հարթակի միջոցով, ինչը նշանակում է, որ նրանք ունեն Հայաստանում բնակության ու աշխատանքի իրավունք` հաստատված աշխատանքային պայմանագրի հիմքով։ Այս մասին Sputnik Արմենիայի հետ զրույցում հայտնեց Միգրացիոն ծառայության պետ Արմեն Ղազարյանը։
«ԵԱՏՄ անդամ քաղաքացիները, որոնք Հայաստանում ձեռք են բերում հանրային ծառայության համարանիշ և գործատուի հետ ստորագրում են աշխատանքային պայմանագիր, հենց այդ պայմանագրի ուժով ձեռք են բերում նաև ՀՀ–ում բնակվելու իրավունք։ Այդ բնակության իրավունքը երբեմն հավաստման կարիք է ունենում, որովհետև ԵԱՏՄ երկրների քաղաքացիները Հայաստանում մտնում են որոշակի իրավահարաբերությունների մեջ, ասենք` ՀՀ պետական, մասնավոր մարմինների, բանկերի և այլ կառույցների հետ։ Դրա համար 2022թ–ի հունվարի 1-ից գործարկվել է workpermit.am հարթակը, որի միջոցով ԵԱՏՄ քաղաքացիները ստանում են բնակության օրինականությունը հավաստող տեղեկանք, իսկ ոչ ԵԱՏՄ անդամ երկրների քաղաքացիները ստանում են աշխատանքի հիմքով կացության կարգավիճակ»,– ասաց Ղազարյանը։
Համակարգը թվայնացված է։ ԵԱՏՄ անդամ քաղաքացիները պետք է միայն լրացնել անհրաժեշտ տվյալները, ներբեռնել իրենց աշխատանքային պայմանագիրը և ստանալ կացության քարտը։
Ընդ որում` Միգրացիոն ծառայության պետի խոսքով` գործընթացը ոչ միայն չի դադարել, այլև ներկա պահին բավական ակտիվացել է։
«Հոսքը բավականին մեծ է։ Վերջին ամիսներին ակտիվության աճ է նկատվում։ Դիմումների քանակն է մեծ, զանգերի քանակն է մեծ երբեմն այն աստիճան, որ չենք հասցնում սպասարկել։ Բայց մենք հիմա ավելացնում ենք կարողությունները, որպեսզի կարողանանք իրավիճակը կարգավորել»,– ասաց Ղազարյանը։
Պաշտնական վիճակագրության համաձայն` 2022 թվականի առաջին կիսամյակում Հայաստանի Հանրապետություն մուտք է գործել 372 086 ՌԴ քաղաքացի, որոնցից 331 306–ը լքել է երկրի տարածքը, իսկ 40 780–ն ավելի երկար ժամկետով են մնացել Հայաստանում։