ԵՐԵՎԱՆ, 9 սեպտեմբերի – Sputnik. Սինքֆիլդի գավաթի ամենամյա մրցաշարի 6-րդ տուրում Հայաստանի հավաքականի նախկին առաջատար Լևոն Արոնյանը սպիտակ ֆիգուրներով մրցեց ֆրանսիացի գրոսմայստեր Մաքսիմ Վաշիե-Լագրավի հետ և առաջին հաղթանակը տարավ մրցաշարում։ Մրցաշարն անցկացվում է ԱՄՆ-ի Սենթ Լուիս քաղաքում։
Արոնյանը 6-րդ տուրում վաստակել է 3 միավոր և Ֆրանսիայի ներկայացուցիչ Ալիռեզա Ֆիրուջայի, ռուսաստանցի Յան Նեպոմնյաշչիի ու ամերիկացի Ֆաբիանո Կարուանայի հետ կիսում է 3-6-րդ տեղերը։
Մրցաշարում միանձնյա առաջատարն է ամերիկացի Ուեսլի Սոն, որն այս տուրում պարտության մատնեց իր համերկրացուն` Հանս Նիմանին։
Նշենք, որ բացի Լևոն Արոնյանից 5–րդ տուրում խաղում են աշխարհի գործող չեմպիոն, նորվեգացի Մագնուս Կարլսենը, ռուսաստանցի Յան Նեպոմյաշչին, Ֆրանսիայի ներկայացուցիչներ Ալիռեզա Ֆիրուջան և Մաքսիմ Վաշիե-Լագրավը, ամերիկացիներ Ֆաբիանո Կարուանան, Հանս Նիմանը, Լենիեր Դոմինգեսը և Ուեսլի Սոն, ինչպես նաև ադրբեջանցի Շահրիյար Մամեդյարովը։
Լենիեր Դոմինգեսն այս տուրում ազատ էր, քանի որ աշխարհի չեմպիոն, նորվեգացի Մագնուս Կարլսենը երրորդ տուրում Հանս Նիմանին պարտվելուց հետո հրաժարվել է հետագա մասնակցությունից։
Դասական շախմատի կանոններով անցկացվող մրցաշարի մրցանակային ֆոնդը կազմում է 350 հազար դոլար, որից հաղթողը կստանա 100 հազար դոլար։