ԵՐԵՎԱՆ, 9 սեպտեմբերի – Sputnik. Լատվիայի կառավարությունը որոշել է սահմանափակել շենգեն վիզա ունեցող ռուսաստանցիների մուտքը երկիր։ Այս մասին, ՌԻԱ Նովոստիի փոխանցմամբ, հայտարարել է երկրի արտգործնախարար Էդգարս Ռինկևիչսը։
Ավելի վաղ Ռինկևիչսը հայտարարել էր, որ ԵՄ ԱԳՆ ղեկավարների խորհրդի նիստում պայմանավորվածություն է ձեռք բերվել, որ ՌԴ–ի հետ սահմանակից երկրները կարող են արգելել շենգեն վիզա ունեցող ռուսաստանցիների մուտքն իրենց երկիր։
Նրա խոսքով` ՌԴ քաղաքացիներին տրամադրված 12 մլն վիզան մեկ որոշմամբ չեղարկելն «անհնար է ինչպես իրավաբանորեն, այնպես էլ տեխնիկապես», բացի դրանից, «այդ 12 միլիոնից ոչ բոլորը պետք է հետ կանչվեն», այդ պատճառով Լատվիան այլ երկրների հետ մեկտեղ կհամապատասխանեցնի որոշումներն ու դրանց ուժի մեջ մտնելու ժամանակը։ Լիտվայի արտգործնախարար Գաբրիելյուս Լանդսբիրգիսը միևնույն ժամանակ նշել է, որ որոշումների կայացումը կարող է մի քանի շաբաթ տևել։
Օգոստոսի վերջին ԵՄ դիվանագիտության ղեկավար Ժոզեպ Բորելն ասաց, որ ԵՄ երկրները քաղաքական պայմանավորվածություն են ձեռք բերել Ռուսաստանի հետ պարզեցված վիզայի ռեժիմն ամբողջությամբ կասեցնելու վերաբերյալ, սակայն ՌԴ քաղաքացիների որոշ կատեգորիաներ նախկինի պես կկարողանան ԵՄ–ի մուտքի վիզա ստանալ։
Ավելի վաղ ՌԻԱ Նովոստիի Եվրոպական հանձնաժողովում հիշեցրին, որ ԵՄ անդամ երկրները կարող են ինքնուրույն սահմանափակել վիզաների տրամադրումը, սակայն միշտ կլինեն մարդկանց կատեգորիաներ, որոնց վիզա տալն անհրաժեշտ կլինի, օրինակ` մարդասիրական առաքելություններ իրականացնողների, ԵՄ–ում գտնվողների ընտանիքի անդամների, ինչպես նաև լրագրողների և այլախոհների դեպքերում։