ԵՐԵՎԱՆ, 8 սեպտեմբերի — Sputnik. Հայաստանում 1 022 831 ամբողջությամբ պատվաստված քաղաքացիներից կորոնավիրուսով հիվանդացել է 42 359 մարդ կամ 4,1 տոկոսը: Տեղեկությունն ի պատասխան Sputnik Արմենիայի գրավոր հարցման հայտնել են առողջապահության նախարարությունից։
Գերատեսչությունից հայտնել են նաև, որ COVID-19-ով կրկնավարակվելու դեպքերն աճել են: Ամսական աճը կազմել է 1 376, իսկ համաճարակի ողջ ընթացքում՝ 20 748։
Ընդ որում, հիվանդների թվի ավելացում գրանցվել է նաև ռիսկի խմբերում։ 2022 թվականի սեպտեմբերի 1-ի դրությամբ կորոնավիրուս հայտնաբերվել է 0-18 տարեկան 20 752 մարդու մոտ։ Ամսական աճը կազմել է 1 121։ Ավելացել է նաև մուլտիսիստեմային բորբոքման համախտանիշով մինչև 18 տարեկան հիվանդների թիվը։ Ընդհանուր թիվը հասել է 165-ի (+3):
Ինչ վերաբերում է հղիներին, ապա մեկուկես ամսվա ընթացքում կորոնավիրուս հայտնաբերվել է 362 կնոջ մոտ։ Ընդհանուր առմամբ համավարակի սկզբից (2020 թվականի մարտի 1-ից մինչև 2022 թվականի սեպտեմբերի 1-ը) COVID-19-ը հայտնաբերվել է 6531 հղիի մոտ:
Մեր երկրում այս ընթացքում հայտնաբերվել է նաև COVID-19-ի «Օմիկրոն» շտամը, այդ թվում նաև դրա BA.4 ու BA.5 ենթատեսակները։
Սեպտեմբերի 4-ի դրությամբ Հայաստանում կորոնավիրուսով վարակման հաստատված դեպքերի թիվը կազմել է 436 727: 3016 մարդ բուժում է ստանում։ COVID-ից մահվան ընդհանուր թիվը կազմում է 8 662 մարդ։