ԵՐԵՎԱՆ, 7 սեպտեմբերի – Sputnik. ՀՀ կրթության, գիտության, մշակույթի և սպորտի նախարարությունը նախատեսում է ուսումնական հաստատությունների համար գործող օրենքում կիրառվող «քոլեջ» և «ուսումնարան» տեսակավորված ձևակերպումներից անցում կատարել միասնական «քոլեջ» բնորոշմանը։ Տեղեկությունը հայտնում է ԿԳՄՍ նախարարության մամուլի ծառայությունը։
Նպատակն է կարգավորել նախնական արհեստագործական և միջին մասնագիտական կրթության ոլորտը` ապահովելով նոր ինստիտուցիոնալ մոտեցումներ և թիրախային զարգացում: Նախատեսվում է, որ քոլեջներում հնարավոր կլինի իրականացնել ինչպես միջին մասնագիտական, այնպես էլ արհեստագործական կրթական ծրագրեր:
Օրենքի նախագծի քննարկման ընթացքում ԿԳՄՍ նախարար Դումանյանը նշել է, որ մշակվող նոր նախագիծն աշխատանքային փուլում է, դեռևս չի հրապարակվել իրավական ակտերի e-draft.am հարթակում:
«Հաշվի առնելով, որ մշակվող փաստաթուղթը հիմնարար օրենք է լինելու արհեստագործական և միջին մասնագիտական կրթության ոլորտի համար, մենք կարևորում ենք, որ աշխատանքային տարբերակը լայնորեն քննարկվի շահագրգիռ բոլոր կողմերի հետ և ծագող բոլոր հարցերը ստանան պատասխան ու մինչև հրապարակվելն ունենան հիմնավորում»,- նշել է նա:
Նոր օրենքի նախագծի մշակումները Գերմանիայի միջազգային համագործակցության ընկերության (GIZ) և «Շվեյցարիայի եկեղեցու oգնություն» (HEKS/EPER) կազմակերպության փորձագիտական աջակցությամբ սկսվել են մոտ 2 տարի առաջ:
Քննարկմանը մասնակցող ԿԳՄՍ փոխնախարար Ժաննա Անդրեասյանի խոսքով` ներկայացվող նախագծի նախնական տարբերակը քննարկվել է թիրախային տարբեր խմբերի, այդ թվում՝ ՄԿՈւ հաստատությունների տնօրենների, ոլորտի փորձագետների, սոցիալական գործընկերների, պետական այլ գերատեսչությունների մասնակցությամբ: Քննարկումներ են նախատեսվում նաև գործատուների հետ:
«Նոր նախագիծն ինստիտուցիոնալ մեխանիզմներ է առաջարկում աշխատանքի վրա հիմնված ուսուցման և դուալ կրթության մոդելի համար, որը 2017 թվականից սկսած փորձարկվել է 10-ից ավելի հաստատությունում, և առկա է բավարար փորձ: Առաջարկվող լուծումները հիմնված են դրական փորձի վրա, որոնք նախագծի շրջանառության փուլում կարող են լրամշակվել»,- նշել է Ժաննա Անդրեասյանը:
Ըստ փոխնախարարի` նախագծի նոր կարգավորումները մեծացնում են մասնագիտական կրթության և ուսուցման համակարգի ներառականությունը, որն այս ոլորտում դեռևս լուրջ խնդիր է:
Անդրեասյանի խոսքով` ՄԿՈւ ոլորտում նույնպես նախատեսվում է դասավանդողների ատեստավորում, որի արդյունքների հիման վրա կբարձրացվեն նաև աշխատավարձերը:
Առաջարկվող փոփոխությունների և նոր կարգավորումների վերաբերյալ ծավալվել է ակտիվ քննարկում: Քննարկումներն ու նախագծի լրամշակման աշխատանքները կշարունակվեն: