ԵՐԵՎԱՆ, 6 սեպտեմբերի – Sputnik. Հայաստանի զբոսաշրջության ցուցանիշն 2022-ին աճել է, բայց 2019-ի նախաքովիդյան ցուցանիշից դեռ ցածր է մնում։
Այս մասին ֆեյսբուքյան գրառմամբ հայտնել է ՀՀ էկոնոմիկայի նախարար Վահան Քերոբյանը։
«Օգոստոս ամսին Հայաստան այցելած զբոսաշրջիկների քանակը կազմել է մոտ 262 հզ՝ հանգրվանելով 2019-ի ցուցանիշից փոքր-ինչ հարավ»,– գրել է Քերոբյանը։
«Հարավն», ըստ ամենայնի, նշանակում է, որ հիշյալ ցուցանիշը դեռ ցածր է 2019-ի օգոստոսյան ցուցանիշից։ Նախարարի հրապարակած աղյուսակից պարզ է դառնում, որ 2022–ի օգոստոսին Հայաստան է ժամանել 261 834 մարդ, իսկ 2019-ի օգոստոսին` 288 260։ Ի դեպ, ընթացիկ տարվա ոչ միայն օգոստոս, այլև մնացած բոլոր ամիսների զբոսաշրջային տվյալները ևս զիջում են 2019-ի համապատասխան ցուցանիշներին։ Այնպես որ, այս ոլորտին առայժմ չի հաջողվել վերականգնել նախաքովիդյան ու նախապատերազմյան մակարդակն անգամ ՌԴ–ից ժամանած մեծ թվով զբոսաշրջիկների ու ժամանակավոր տեղափոխվածների հաշվին։
Տուրիստական հոսքերը, ըստ ներկայացված վիճակագրության, հատկապես աճել են մայիս–օգոստոս ժամանակահատվածում։
«Հուլիս և օգոստոս ամիսներին Հայաստանում զգացվել է հյուրանոցային համարների սուր պակաս, որի առթիվ հրավիրում եմ այս ոլորտի նկատմամբ հետաքրքրություն ունեցող ներդրողների և գործարարների ուշադրությունը»,– հայտնում է Քերոբյանը։
Այս տարի Հայաստան ժամանած զբոսաշրջիկների թվով առաջին տեղում ՌԴ քաղաքացիներ են, որոնք կազմում են զբոսաշրջային հոսքի 45 տոկոսը։ Երկրորդ տեղում Վրաստանն է (9%), երրորդում` Իրանը (7%), չորրորդում` ԱՄՆ–ը (3%), հինգերորդում` Գերմանիան (1%)։
Ուշագրավ է, որ զբոսաշրջիկների 64%-ը ՀՀ է ժամանել ինքնաթիռով`63%-ը` «Զվարթնոց» օդանավակայանով, 1%–ը` Գյումրիի օդանավակայանով։ 32 %-ը Հայաստան են անցել Վրաստանի հետ սահմանային անցակետերով, 5%-ը` Մեղրիի։
Այս տարվա հունվար-օգոստոս ամիսներին Հայաստան է ժամանել ընդհանուր շուրջ 1 մլն 30 հազար զբոսաշրջիկ։