ԵՐԵՎԱՆ, 31 օգոստոսի - Sputnik, Արմենուհի Մխոյան. Տոնի շրջանակում նախատեսվում է անցկացնել արհեստի ու արվեստի տոնավաճառներ, ունենալ մանկական և երիտասարդական համերգային հարթակներ, ցուցահանդեսներ: Ի տարբերություն նախորդ տարիների, այս տարի տոնակատարությունը հրավառությամբ չի եզրափակվի: Չի լինի նաև պարգևների ու կոչումների հանձնում. դա այսուհետ կիրականացվի միայն հատուկ խորհրդի որոշմամբ:
Այս տարի տոնակատարությունները միայն մշակութային են. կարմիր ժապավեն չի կտրվելու՝ շահագործման հանձնվող բնակարաններ կամ հիմնանորոգված փողոցներ չկան: Դրանք ավելի ուշ կլինեն, Sputnik Արմենիայի հետ ունեցած զրույցի ժամանակ նշեց Գյումրու քաղաքապետ Վարդգես Սամսոնյանը, վստահեցնելով՝ Գյումրու օր տոնակատարությունը այս անգամ շատերը կհիշեն:
«Կարմի ժապավեններ դեռ կհասցնենք կտրել, բայց խոստանում ենք, որ այդ օրը շատ հյուրեր ենք ունենալու, ու շատերն են հիշելու, իսկ ամենահետքրքիր մասը լինելու է երեկոյան. տոների ավարտը կազդարարվի շքեղ համերգով՝ Վարդանանց հրապարակի գլխավոր բեմում կլինեն Հայաստանի պետական սիմֆոնիկ նվագախումբը և «Ռեինկարնացիան»»,- նշեց քաղաքապետը, տեղեկացնելով՝ այդ օրը գործելու են քաղաքի բոլոր թանգարանները մինչև 19։00-ն։
Միջոցառումների անցկացման համար, ավագանու որոշմամբ համայնքային բյուջեից 8 մլն դրամ է հատկացվել, բայց քաղաքապետը վստահ է՝ տնտեսումներ կլինեն: Ի դեպ, «Երևանի օրերը Գյումրիում» տոնակատարության շրջանակներում նախատեսվող համերգը մայրաքաղաքի նվերն է «հայրաքաղաքին»՝ համերգի կազմակերպչական ծախսերը կատարվելու են մայրաքաղաքի բյուջեից:
Հավելելենք, որ այդ օրը ժամը 11։00-ից մինչև 19։00-ն քաղաքի պատմական միջուկում՝ Ռուսթավելի փողոցում, կգործի «Գյումրի․ վարպետաց քաղաք» արհեստի ու արվեստի տոնավաճառը: Ժամը 12։00-ից սկսած մինչև 19։00-ն գյումրեցիներին և քաղաքի հյուրերին սպասում են Թատերական հրապարակում. համերգային ծրագրով կներկայանան քաղաքի մանկական ու երիտասարդական խմբերը: Ժամը 12։00-ին «Հյուր՝ Վարպետին» ծրագրով իր հյուրընկալ հարկի տակ բոլորին կընդունի Ավ․ Իսահակյանի հուշատուն-թանգարանը:
12։30-ից սկսած նույն խորագրով միջոցառում կանցկացվի Հովհաննես Շիրազի հուշատուն-թանգարանի բակում: Գյումրու Աբովյան փողոցում ժամը 13։00-ին կկազմակերպվի «Art and Craft Souvenirs» ցուցահանդես-տոնավաճառը:13։30-ին Մարիամ և Երանուհի Ասլամազյան քույրերի պատկերասրահում կբացվի գեղագետ, արվեստաբան և գծանկարիչ Լևոն Լաճիկյանի գծանկարների «Գյումրի եւ անդին․․․» խորագրով ցուցահանդեսը: Եվս մեկ ցուցահանդես կբացվի ժամը 14։00-ին՝ Գյումրու համայնքային ցուցասրահում: