ArtsakhTV-ին հրապարակել է տեսանյութ, որում ցույց է տալիս, թե ինչպես է նոր ճանապարհով իրականացվում Ստեփանակերտ-Գորիս երթևեկությունը:
Ստեփանակերտ-Գորիս նոր երթուղին սկսվում է Շուշիի շրջանի Բերդաձորի ենթաշրջանի խաչմերուկից, անցնում Հին Շեն և Մեծ Շեն գյուղերով և 4,7 կիլոմետրանոց ժամանակավոր ճանապարհով միանում Աղավնո-Գորիս մայրուղուն:
Արցախի Անվտանգության խորհրդի երեկվա նիստում որոշվել է օգոստոսի 30-ի ժամը 20:00-ից ՀՀ հետ հաղորդակցությունն իրականացնել նոր երթուղով՝ Շուշիի շրջանի Բերդաձորի ենթաշրջանի տարածքով։ Նիստում նշվել էր, որ երթուղին Գորիս-Ստեփանակերտ մայրուղուն ժամանակավորապես կապող մոտ 4,7 կմ ճանապարհի ասֆալտապատման աշխատանքներն ավարտված են:
ՌԴ խաղաղապահները տեղակայվել են Արցախը Հայաստանին կապող նոր երթուղու ժամանակավոր հատվածում, մինչև կկառուցվի հիմնական միջանցքը։
Նշենք, որ նոր երթուղու հիմնական ճանապարհը 2023-ի գարնանից անցնելու է Սյունիքի Կոռնիձոր գյուղի կողքով և միանալու է Ադրբեջանի կառուցած ճանապարհին։
Հիշեցնենք` օգոստոսի 5-ին հայտնի դարձավ, որ Արցախի տարածքային կառավարման և ենթակառուցվածքների նախարար Հայկ Խանումյանը Քաշաթաղի շրջանի Աղավնո գյուղում տեղի բնակչության, համայնքի և շրջանի իշխանության ներկայացուցիչների հետ քննարկել է Աղավնոյի, Ներքին Սուսի և Բերձորի բնակչության՝ մինչև սույն թվականի օգոստոսի 25-ը տարհանման հարցերը։
Դրանից մեկ օր առաջ` օգոստոսի 4-ին, ՀՀ տարածքային կառավարման և ենթակառուցվածքների նախարար Գնել Սանոսյանը հայտնել էր, որ Լաչինի միջանցք կոչվող ճանապարհի այլընտրանքային հատվածի կառուցման աշխատանքներն արդեն սկսվել են ու մինչև գարուն կավարտվեն։
Նշենք, որ 2020 թվականի նոյեմբերի 9-ի եռակողմ հայտարարության 6-րդ կետում ասվում է, որ երեք տարում Արցախը Հայաստանի հետ կապող նոր ճանապարհի նախագիծ է լինելու։