ԵՐԵՎԱՆ, 29 օգոստոսի – Sputnik․ Զապորոժիեի ԱԷԿ-ի հատուկ մասնաշենքի (որտեղ պահվում է ռեակտորի վառելանյութը) ծածկում անցք է բացվել ուկրաինական զորքերի գնդակոծության հետևանքով: Այս մասին իր Telegram-ալիքում հայտնել է Զապորոժիեի մարզի վարչակազմի ներկայացուցիչ Վլադիմիր Ռոգովը։
«Զապորոժիեի ԱԷԿ-ի №1 հատուկ կորպուսի՝ Զելենսկու գրոհայինների հարվածից ծակված տանիքը։ Տվյալ մասնաշենքում թարմ վառելիք է պահվում ԶԱԷԿ-ի ռեակտորների համար»,-ասել է Ռոգովը:
Նա տեղադրել է լուսանկարներ, որտեղ երևում է պահեստարանի տանիքը։
Զապորոժիեի ԱԷԿ-ը գտնվում է Էներգոդար քաղաքի հարևանությամբ` Դնեպրի ձախ ափին։ Այն Եվրոպայում ԱԷԿ-ի բլոկների թվով և սահմանված հզորությամբ ամենամեծն է։ Մարտից ատոմակայանը ՌԴ զինվորականների պաշտպանության ներքո է։
Հատուկ գործողության ընթացքում ՌԴ զինվորականները վերահսկողության տակ են վերցրել Խերսոնի մարզն ու Զապորոժիեի մարզի մերձազովյան հատվածը։ Երկու շրջաններում էլ նոր վարչակազմեր են ձևավորվել, հեռարձակվում են ռուսական հեռուստաալիքներ և ռադիոկայաններ, վերականգնվում են առևտրային և տրանսպորտային կապերը Ղրիմի հետ: Տարածաշրջանները հայտարարել են Ռուսաստանի կազմում ընդգրկվելու մտադրության մասին։ Բացի այդ, ութ տարի անց ապաշրջափակվել է Հյուսիս-Ղրիմյան ջրանցքը, ջուրը կրկին հասնում է թերակղզի։