ԵՐԵՎԱՆ, 29 օգոստոսի – Sputnik. Մեծ Բրիտանիայի ռազմաօդային ուժերի ինքնաթիռները Համաշխարհային երկրորդ պատերազմից ի վեր առաջին անգամ կտեղափոխվեն երկրի քաղաքացիական օդանավակայաններ ՌԴ–ի հետ հարաբերություններում լարվածության աճի պատճառով։ Տեղեկությունը հայտնում է ՌԻԱ Նովոստին` հղում անելով «Daily Express» թերթին։
Ինչպես գրում է պարբերականը, սեպտեմբերին Նորֆոլկ և Լինկոլնշիր կոմսություններում տեղակայված «Eurofighter Typhoon» և «F-35» կործանիչները փորձարկումների ժամանակ կբաժանվեն փոքր խմբերի և կտեղակայվեն երկրի ծայրամասերում գտնվող մի շարք օդանավակայաններում։
Ըստ պարբերականի` տեղափոխման նպատակ մեկն է`երաշխիք ունենալ, որ Մեծ Բրիտանիայի ՌՕՈւ–ի արագ արձագանքման ուժերը կկարողանան դիմակայել սեփական բազաների վրա անմիջական հարձակումները։
Նշվում է, որ վերջին մեկ տարում Մեծ Բրիտանիայի պաշտպանության նախարարության աշխատակիցները մի քանի անգամ այցելել են երկրի քաղաքացիական օդանավակայաններ` պարզելու, թե որքան ինքնաթիռ և պահուստային հզորություն, ինչպես նաև ցամաքային անձնակազմ կարելի է տեղակայել այնտեղ արտակարգ իրավիճակների դեպքում։
Ռազմական ինքնաթիռների տեղափոխումը կիրականացվի «Agile Combat Employment» (ACE) հայեցակարգի շրջանակում, որն ուղղված է մեծ թվով տեղակայման վայրերից թագավորական ռազմաօդային ուժերին գործելու հնարավորություն տալուն` այդպիսով ապահովելով նրանց ճկունությունն ու հուսալիությունը։
Այդ հայեցակարգը մշակվել է ավելի քան մեկ տարի առաջ և նախատեսվել է Հնդկական-խաղաղօվկիանոսյան շրջանի, Մերձավոր Արևելքի կամ Եվրոպայում ՆԱՏՕ–ի արևելյան շրջանների պես պոտենցիալ թեժ կետերում կիրառելու համար։ Սակայն, ինչպես գրում է պարբերականը, Ուկրաինայում ՌԴ–ի հատուկ գործողությունների մեկնարկից հետո ACE ծրագիրն արագացվել է և տարածվել Մեծ Բրիտանիայի ամբողջ տարածքի վրա։