Լիբիայում քաղաքական ճգնաժամը սրվել է. հակառակորդ խմբավորումների միջև փոխհրաձգություններ են տեղի ունենում։
Al Arabiya հեռուստաալիքը հայտնում է, որ Տրիպոլիում զինված բախումների հետևանքով 7 մարդ զոհվել է, ավելի քան 30-ը՝ վիրավորվել։
Հեռուստաալիքի տվյալներով՝ բախումներ են սկսվել Լիբիայի Ազգային միասնության կառավարության ղեկավար Աբդելհամիդ Դբեյբայի և խորհրդարանի կողմից ընտրված վարչապետ Ֆաթհի Բաշագեի միջև:
Քաղաքի կենտրոնում ինտենսիվ կրակոցներ են սկսվել այսօր առավոտից։
Այս շաբաթ խորհրդարանի կողմից ընտրված Լիբիայի վարչապետ Ֆաթխա Բաշագան ազգային միասնության կառավարության ղեկավար Աբդելհամիդ Դբեյբային նամակ էր հղել, որում հերթական անգամ նրանից պահանջել էր վայր դնել լիազորությունները` երկրում արյունահեղություն թույլ չտալու համար։
Դբեյբան իր հերթին Տրիպոլի իշխանության գլուխ դառնալու հավակնություն ունեցող Բաշագային խորհուրդ է տվել կենտրոնացնել ուժերն ընտրությունների մասնակցության ուղղությամբ։
Հիշեցնենք, որ Լիբիայի արևելքում գտնվող խորհրդարանը փետրվարին վարչապետի պաշտոնի համար քվեարկել էր ՆԳՆ նախկին ղեկավար Ֆաթխա Բաշագայի օգտին։ Մարտին Բաշագայի ձևավորած կառավարության նախարարները Թոբրուկ քաղաքում երդում տվեցին խորհրդարանի առաջ։
Ազգային միասնության կառավարության գործող ղեկավար Աբդելհամիդ Դբեյբան ավելի վաղ հայտարարել էր, որ իշխանությունը նախքան նախագահական ընտրությունները չի փոխանցի, ինչը երկրին հերթական երկիշխանությամբ է սպառնում։ Մայիսին խորհրդարանի կողմից կառավարության ղեկավար նշանակած Բաշագան Տրիպոլիի նախարարների կաբինետի համակրանքը շահելու անհաջող փորձերից հետո հայտարարեց, որ կառավարությունը կսկսի գործել Սիրտ քաղաքում։