ԵՐԵՎԱՆ, 26 օգոստոսի – Sputnik. Երևանի «Սուրմալու» առևտրի կենտրոնում տեղի ունեցած պայթյունի դեպքի առթիվ նախաձեռնված քրեական վարույթով այսօր 4 անձ է ձերբակալվել։ Տեղեկությունը հայտնում է ՀՀ գլխավոր դատախազության մամուլի խոսնակ Արևիկ Խաչատրյանը։
Նշվում է, որ օգոստոսի 25-ին Երևան քաղաքի դատախազությունում ստացվել և ուսումնասիրվել են սույն թվականի օգոստոսի 14-ին, ժամը 13:30-ի սահմաններում «Սուրմալուում» տեղի ունեցած պայթունի դեպքով քննվող քրեական վարույթի նյութերը:
«Ուսումնասիրության արդյունքում քրեական վարութի նյութերում առկա, անձանց կողմից հանցանքի կատարման մասին վկայող փաստերի հիման վրա դատախազը որոշել է 2 անձի նկատմամբ ՀՀ քրեական օրենսգրքի 357-րդ հոդվածի 2-րդ մասով (Հրդեհային անվտանգության կանոնները կամ պահանջները խախտելը, որն անզգուշությամբ առաջացրել է մարդու մահ կամ այլ ծանր հետևանք) հանրային քրեական հետապնդում հարուցելու մասին: Եվս 2 հոգու նկատմամբ էլ որոշում է կայացվել հանրային քրեական հետապնդում հարուցել ՀՀ քրեական օրենսգրքի 165-րդ հոդվածի 2-րդ մասով (Անզգուշությամբ երկու կամ ավելի անձի կյանքից զրկելը)»,- ասված է հաղորդագրությունում:
Դատախազությունից հայտնում են, որ քրեական վարույթի նախաքննության մանրամասների վերաբերյալ կտրվի լրացուցիչ տեղեկատվություն:
Բանն այն է, որ ոչ միայն 2022թ. օգոստոսի 14-ին տեղի ունեցած պայթյունի, այլև 2021թ.-ի ապրիլի 6-ին տեղի ունեցած հրդեհի դեպքերով հարուցված քրեական գործերի նախաքննության ընթացքում 2021 թվականին կատարված տեսչական ստուգումների արդյունքում «Սուրմալուում» հայտնաբերվել են տեխնիկական և հրդեհային անվտանգության նորմատիվ փաստաթղթերի պահանջների 16 խախտումներ և արձանագրվել դրանց վերացման ժամկետները: Իսկ վերջնաժամկետից հետո նոր ստուգումներին և կանխարգելիչ միջոցառումներին ուղղված որևէ գործողություն չի իրականացվել:
Պարզվել է նաև, որ «Սուրմալու» առևտրի կենտրոնում որոշ տնտեսվարողներ զբաղվել են հրագործական արտադրատեսակների պահեստավորմամբ և ազատ վաճառքով, ինչը ՀՀ տարածքային կառավարման և արտակարգ իրավիճակների նախարարի 18.06.2015թ. 595 հրամանով հաստատված հրդեհային անվտանգության կանոններով արգելված է:
Հիշեցնենք` «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ 16 մարդ մահացել է, մեկ մարդ համարվում է անհետ կորած։