ԵՐԵՎԱՆ, 26 օգոստոսի – Sputnik. ՀՀ վարչապետ Նիկոլ Փաշինյանը կոչ է անում վերադառնալ Եվրասիական տնտեսական միության երկրների միջև մաքսատուրքերի բաշխման միասնական մեթոդաբանությանը։
Ելույթ ունենալով Ղրղզստանում կայացած Եվրասիական միջկառավարական խորհրդի նիստում՝ վարչապետն ուշադրություն հրավիրեց այն հանգամանքի վրա, որ վերջին ամիսներին միության արտաքին առևտրի կառուցվածքի փոփոխման հետ կապված մաքսատուրքերի բաշխման գործընթացում զգալի շեղումներ են նկատվում:
«Անհրաժեշտ ենք համարում ամենամոտ ապագայում վերադառնալ մաքսատուրքերի բաշխման միասնական մեթոդիկային»,- ասաց նա։
Հիշեցնենք, որ այսօր` օգոստոսի 26-ին, Ղրղզստանում անցկացվում է Եվրասիական միջկառավարական խորհրդի ընդլայնված նիստը։
ԵԱՏՄ-ն միջազգային ինտեգրացիոն տնտեսական միավորում է, որը ստեղծվել է Մաքսային միության և Միասնական տնտեսական տարածքի հիման վրա և գործում է 2015 թվականի հունվարի 1-ից: Այժմ ԵԱՏՄ անդամ են Ռուսաստանը, Հայաստանը, Բելառուսը, Ղազախստանը և Ղրղզստանը։