ԵՐԵՎԱՆ, 26 օգոստոսի – Sputnik. «Վանաձոր» բուժկենտրոնից հղին Երևան է տեղափոխվել գիտակից վիճակում։ Նման պարզաբանում է տարածել «Վանաձորի» ԲԿ-ն` անդրադառնալով ծննդկանի մահվան դեպքին և Երևանի վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տարածած հաղորդագրությանը։
Հայտնել էինք, որ երեկ Երևանում 20 տարեկան ծննդկան է մահացել։ Հանրապետական ինստիտուտը պարզաբանել էր, թե կինը` Մերի Գրիգորյանը, իրենց մոտ է տեղափոխվել ծայրահեղ ծանր՝ հոգեվարքային վիճակում։ Ըստ հաղորդագրության` կյանքի հետ անհամատեղելի տվյալներով՝ անգիտակից վիճակում, ծննդկանին հասցրել են Հանրապետական ինստիտուտի վերակենդանացման բաժանմունք, որտեղ էլ նա մահացել է։
«Վանաձորի» ԲԿ-ն իր հերթին հայտնում է, որ կինն իրենց մոտ է ընդունվել օգոստոսի 22-ին՝ ժամը 18:40-ի սահմաններում, ուժեղ ցավերով: Հղիի մոտ հաստատվել է աջակողմյան լումբոիշալգիա: Օգոստոսի 24-ին նկատվել են ցավեր կրծքավանդակի շրջանում, հրավիրվել են թերապևտի, նյարդաբանի. ցուցվել է կատարել մագնիսառեզոնանսային (MRT) հետազոտություն։ «Վանաձորի» ԲԿ-ում MRT չի իրականացվում, կապ են հաստատել Հանրապետական ինստիտուտի հետ, պայմանավորվել են ծննդկանին տեղափոխել այնտեղ։ Սակայն, ըստ «Վանաձորի» ԲԿ-ի, նշված կառույցից ժամեր անց առաջարկել են ծննդկանին տեղափոխել օգոստոսի 25-ին:
«Տեղափոխման ժամանակ հղիի ճնշումը եղել է 90/60, սատուրացիան՝ 97: Հղիի վիճակը մինչ շտապօգնության մեքենան նստեցնելը գնահատվել է շտապօգնության բժշկի կողմից: Կայուն հեմոդինամիկ ցուցանիշներով նա տեղափոխվել է Երևան: Եթե կինը լիներ անգիտակից կամ այնպիսի վիճակում, ինչպես նշված է հանրապետական ինստիտուտի տարածած հաղորդագրության մեջ, ապա նա չէր ճանապարհվի Երևան»,- ասված է հաղորդագրության մեջ։
Նշվում է նաև, որ շտապօգնության մեքենայի մեջ կնոջ գիտակցությունն ու խոսքը տեղն է եղել, կնոջ վիճակը կտրուկ վատացել է Հանրապետական ինստիտուտի ընդունարանում, միանգամից տեղափոխվել է վերակենդանացման բաժանմունք, որտեղ էլ կարճ ժամանակ անց արձանագրվել է հղիի մահը:
Հիշեցնենք` ըստ հանրապետական ինստիտուտի` օգոստոսի 25-ին «Վանաձոր» ԲԿ-ում արձանագրվել է ծննդկանի պտղի մահը, ապա կինը տեղափոխվել է Երևան։ Իսկ «Վանաձորի» ԲԿ-ն պտղի մասին որևէ հիշատակում չի արել։ Հանրապետական ինստիտուտը հայտնել էր նաև, որ փաստի առթիվ նախաձեռնվել է քրեական վարույթ «Վանաձոր» բժշկական կենտրոնի բժշկի նկատմամբ, որի անունն առայժմ չի հրապարակվում։