ԵՐԵՎԱՆ, 24 օգոստոսի – Sputnik. ՀՀ կառավարությունը մտադիր է ևս 300 տոննայով ավելացնել սիգի արդյունագործական որսի ծավալները և Սևանում որսի իրականացման ժամկետը երկարաձգել մինչև նոյեմբերի 20-ը։ Համապատասխան որոշումն առանց զեկուցման ու քննարկման ընդունվեց ՀՀ կառավարության այսօրվա նիստում։
Գործադիր մարմնի կայքում հրապարակված նախագծում նշված է, որ աշնանային որսաշրջանի համար նախատեսված որսաքանակը սահմանվել է ԳԱԱ Կենդանաբանության և հիդրոէկոլոգիայի գիտական կենտրոնի, «Սևան» ազգային պարկի, Գեղարքունիքի մարզպետարանի, Գեղարքունիքի մարզը ներկայացնող ԱԺ պատգամավորների, ինչպես նաև ձկնորսների և այլ շահագրգիռ անձանց հետ քննարկումների արդյունքում։
«Կենդանաբանության և հիդրոէկոլոգիայի գիտական կենտրոնի կողմից իրականացվել է Սևանա լճում ձկան պաշարների գնահատման համար լրացուցիչ ուսումնասիրություններ, մասնավորապես կարևորվել է 1+ տարեկան սիգ ձկնատեսակի կենսավիճակի և չափաքանակի գնահատումը։ Ուսումնասիրությունների արդյունքում ձեռք բերված տվյալների հիման վրա գիտական կենտրոնի կողմից 2022 թվականի սեպտեմբերի 1-ից մինչև նոյեմբերի 20-ը ընկած ժամանակահատվածի համար առաջարկվել է սիգի արդյունագործական որսի ևս 300 տոննա չափաքանակ»,– ասված է որոշման նախագծի հիմնավորման մեջ։
Հիշեցնենք` 2022 թվականի մարտի 1-ից Սևանա լճում պաշտոնապես մեկնարկած արդյունագործական որսի համար մինչև սեպտեմբերի 1-ը սահմանված է եղել 300 տոննա սիգի չափաքանակ։ Կառավարության ներկայացրած պաշտոնական տվյալներով` սիգի որսը գործնականում մեկնարկել է 2022 թվականի ապրիլի 21-ից, նախապատրաստվել է 571 պայմանագիր 300 տ ձկան համար, փաստացի կնքվել է 567 պայմանագիր 295,8 տոննայի համար:
Նշվում է նաև, որ որսի չափաքանակն ավելացնելու արդյունքում այս տարի պետական բյուջե կվճարվի 19,5 մլն դրամ բնօգտագործման վճար։