ԵՐԵՎԱՆ, 19 օգոստոսի – Sputnik. «Բարեկամություն» կամուրջը Հայաստանի և Վրաստանի համար ռազմավարական և տարածաշրջանում եզակի նշանակություն ունի: Այսօր հայ-վրացական սահմանին«Բարեկամության» կամրջի պաշտոնական բացման արարողությանը նման կարծիք հայտնեց Վրաստանի վարչապետ Իրակլի Ղարիբաշվիլին։
Վրաստանի վարչապետի համոզմամբ` «Բարեկամություն» կամուրջը էլ ավելի կամրապնդի երկու երկրների բարեկամությունն ու փոխգործակցությունը։
«Երկու երկրների տարածքում կառուցված, ժամանակակից չափանիշներին համապատասխանող կամուրջը՝ 160 մետր երկարությամբ, եզակի է տարածաշրջանում։ Այն կկրկնապատկի սահմանային անցակետի հզորությունը, կբարելավի տեղաշարժի որակը երկու երկրների քաղաքացիների, հյուրերի և տարանցիկ տրանսպորտային միջոցների համար, ինչպես նաև կամրապնդի երկու երկրների առևտրատնտեսական հարաբերությունները»,- ասաց Ղարիբաշվիլին
Վրաստանի վարչապետն իր ելույթում շեշտեց, որ «Բարեկամություն» կամուրջը ռազմավարական նշանակություն ունի` որպես արևելքը արևմուտքին կապող հանգույց։
«Մենք մեր բարեկամության նոր կամուրջն ենք կառուցել։ Կամուրջն ուժեղացնում է մեզ, մեր երկրներին, տարածաշրջանը»,- համոզմունք հայտնեց Ղարիբաշվիլին։
Բացման արարողությանը ելույթով հանդես է եկել նաև ՀՀ վարչապետ Նիկոլ Փաշինյանը։ Նա ևս հայտնել է, որ կամուրջը կարևոր հանգույց է երկու երկրների առևտրատնտեսական հարաբերությունների հզորացման առումով։
Հիշեցնենք` կամրջի շինարարությունը մեկնարկել է 2021 թվականի մայիսին։
Կառույցը բաղկացած է իրարից 1 մետր հեռավորության վրա գտնվող երկու զուգահեռ կամուրջներից, յուրաքանչյուր կամրջի լայնությունը 11.85 մ է, երթևեկելի հատվածի լայնությունը՝ 8.35մ, յուրաքանչյուր կամրջի երկարությունը՝ 160 մ:
Կամրջի կառուցման արժեքը ինը մլն եվրո է, Հայաստանը և Վրաստանը 50/50 ֆինանսավորել են այն՝ տրամադրելով չորսուկեսական մլն եվրո։