ԵՐԵՎԱՆ, 19 օգոստոսի – Sputnik. Չորս տարի առաջ դուստերի կողմից սպանված Միխայիլ Խաչատուրյանին կարող են մեղադրանք ներկայացնել ևս երկու հոդվածով։ Այդ մասին ՌԻԱ Նովոստիին հայտնել է փաստաբան Ալեքսեյ Լիպցերը։
Խաչատուրյան քույրերից մեկի փաստաբանի խոսքով՝ դատախազությունը, գործը վերադարձնելով հետաքննության, «խորհուրդ է տվել քննարկել լրացուցիչ որակման հարցը՝ առողջությանը ծանր վնաս պատճառելու և աղջիկներից մեկին ինքնասպանության փորձի հասցնելու» հոդվածով:
Ավելի վաղ փաստաբան Ալեքսեյ Պապանովը, որը ներկայացնում է մահացածի ընտանիքի շահերը, գործակալությանը պատմել էր, որ դատախազությունը հրաժարվել է հաստատել գործով մեղադրական եզրակացությունը:
Հիշեցնենք` Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դին` վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Լոբաչևսկի մայրուղում գտնվող տան շքամուտքում։ Երեք դուստրերը, որոնք մեղադրվում են հոր սպանության մեջ, խոստովանել են, որ իրենք են սպանել հորը։
Քննչական տվյալների համաձայն՝ քույրերից կրտսերը՝ 11-րդ դասարանի աշակերտուհի Մարիան, հորը դանակի մոտ 35 հարված է հասցրել։ Մյուս երկու աղջիկները՝ Քրիստինան (ավագ քույրը) և Անգելինան (միջնեկը), հարվածներ են հասցրել հոր գլխին, իսկ դեմքին գազային ցողիչ են փչել։
Ավելի ուշ հետմահու հոգեբանա-հոգեբուժական փորձաքննությունը հաստատեց, որ տղամարդը հոգեկան խանգարումներ է ունեցել։ Համացանցում տեսագրություն հայտնվեց, որում հայրը հոգեբանական բռնության է ենթարկում դուստրերին։ Պաշտպանական կողմը պնդում է, որ տարիներ շարունակ Խաչատուրյանը պարբերաբար ծեծել է դուստրերին և «սեռական բռնություն է գործադրել», իսկ աղջիկները գործել են` ելնելով անհրաժեշտ ինքնապաշտպանությունից։