ԵՐԵՎԱՆ, 18 օգոստոսի – Sputnik. ՀՀ վարչապետ Նիկոլ Փաշինյանը, կառավարության նիստում անդրադառնալով «Սուրմալուում» տեղի ունեցած պայթյունի դեպքին, Պետական վերահսկողական ծառայությանը հանձնարարեց ստուգել, թե ինչպես են կատարել իր` 2 տարի առաջ տված հանձնարարականը։
Նա նշեց, որ 2020-ի օգոստոսին Բեյրութում տեղի ունեցած պայթյունից հետո հանձնարարական է տվել գերատեսչություններին, որ տեղեկություններ հավաքեն այն օբյեկտների մասին, որոնք գործ ունեն պայթյունավտանգ նյութերի հետ և որտեղ կարող են լինել նման նյութեր։
«Առաջին գործողությունը, որն արել եմ դրանից հետո, արված աշխատանքի հաշվետվություն եմ ուզել, որը հիմա ամփոփվում է։ Հիմա ՊՎԾ–ին հանձնարարում եմ, որ ստուգեն, թե իմ տված հանձնարարականն ինչպես է կատարվել։ Խնդիրը դրված է եղել այնպես, որ Բեյրութում տեղի ունեցածից հետո Հայաստանում նման բան տեղի չունենա»,–ասաց Փաշինյանը։
Նա նշեց նաև` տեղյակ է, որ հրդեհային և տեխնիկական անվտանգության տեսչական մարմինը 2021-ի գարնանը ստուգումներ է արել «Սուրմալուում» և խախտումներ գտել։ Փաշինյանը հանձնարարական է տվել, որ հրավտանգ նյութերի ներմուծումը, արտադրությունն ու օգտագործումը միայն լիցենզավորված ընկերություններն իրականացնեն։
Փաշինյանն իր խոսքի վերջում ցավակցեց զոհվածների ընտանիքներին։
Հիշեցնենք` «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ Այս պահին հայտնի է, որ 16 մարդ է մահացել, 2 քաղաքացու դեռ որոնում են։