ԵՐԵՎԱՆ, 16 օգոստոսի – Sputnik. «Սուրմալու» առևտրի կենտրոնի շենքի այն հատվածում, որը կանգուն է, իրականացվել և իրականացվում են հովացման աշխատանքներ` պայթյունի վտանգ չկա, սակայն հնարավոր ծխացող օջախների վտանգ կա։ Դեպքի վայրում լրագրողների հետ զրույցում այս մասին ասաց ԱԻ փոխնախարար Դավիթ Համբարյանը։
«Շենք հնարավոր չէ մուտք գործել` վտանգավոր է փրկարարների համար, որոշ հեռավորությունից տեսադիտարկում է արվում։ Որոնողափրկարարական աշխատանքները շարունակվում են դեռ. այս պահի դրությամբ ունենք 16 զոհ, որից 14-ի ինքնությունը պարզվել է։ 8 անձ էլ որոնվում է»,–ասաց փոխնախարարը։
Նրա խոսքով` տարածքի համար պատասխանատու անձանց հետ աշխատանքներ են տարվում, որպեսզի շենքի հատակագծով պայմանավորված հարցեր չլինեն։
Համբարյանը նշեց, որ փլատակներում ողջ մնացած անձանց գտնելու հնարավորությունը գնալով պակասում է։ Նա հավելեց, որ այս պահին գերխնդիրը փլատակների մաքրումն է, որից հետո կանգուն մնացած շենքի խնդիրը պետք է փորձեն լուծել։
Հիշեցնենք՝ «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ Երևան քաղաքի ԲԿ-ներ են դիմել 60 քաղաքացիներ, որոնցից 7-ը շարունակում են բուժում ստանալ, իսկ մյուսները, ստանալով համապատասխան բուժօգնություն, դուրս են գրվել։