ԵՐԵՎԱՆ, 16 օգոստոսի – Sputnik. Ուկրաինայում տիրող իրավիճակի համատեքստում ՌԴ–ի հետ հիբրիդային դիմակայության մեջ ներքաշելու ԱՄՆ–ի քայլերը կարող են միջուկային տերությունների միջև սրացման և անմիջական ռազմական բախման պատճառ դառնալ։ Այս մասին հայտարարել է Վաշինգտոնում ՌԴ դեսպանատունը։
Դիվանագիտական առաքելությունը նշել է, որ ուշադրություն են դարձրել ԱՄՆ վարչակազմի հռետորաբանությանն առ այն, որ ՌԴ գործողություններն իբր չեն համապատասխանում պատասխանատու միջուկային տերության կարգավիճակին։
Դեսպանատան կարծիքով` սարսափելի է լսել միջուկային ոլորտում անպատասխանատվության վերաբերյալ մեղադրանքները մի երկրից, որը ատոմային ռմբակոծության է ենթարկել Հիրոսիմայի և Նագասակիի խաղաղ բնակչությանը։
«Ուկրաինական ճգնաժամի համատեքստում Ռուսաստանի հետ հիբրիդային առճակատման մեջ ներքաշելու ամերիկյան քայլերը կարող են միջուկային տերությունների միջև անկանխատեսելի սրացման և անմիջական ռազմական բախման պատճառ դառնալ», – ասվում է դեսպանատան Telegram–յան ալիքում հրապարակած հայտարարությունում։
ՌԴ դիվանագիտական առաքելությունը Վաշինգտոնին խորհուրդ է տվել ավելի ուշադիր լինել միջուկային ոլորտում սեփական քաղաքականությանը, ոչ թե անհիմն մեղադրանքներ հնչեցնել այն երկրների հասցեին, որոնց աշխարհակարգի վերաբերյալ հայացքները չեն համընկնում Միացյալ Նահանգների հայացքների հետ։