ԵՐԵՎԱՆ, 8 օգոստոսի-Sputnik. Թուրքիայի նախագահ Ռեջեփ Թայիփ Էրդողանը շատ կառուցողական է անվանել Հայաստանի վարչապետ Նիկոլ Փաշինյանի հետ հեռախոսազրույցը։ Ելույթ ունենալով Անկարայում դեսպանների խորհրդաժողովում ՝ Թուրքիայի նախագահը հայտարարել է, որ մոտ ժամանակներս ակնկալում է տարածաշրջանի կայունացում, «եթե Հայաստանն արձագանքի կոչերին», գրում են թուրքական ԶԼՄ–ները:
Էրդողանը հիշատակել է նաև Թուրքիայի կողմից Ադրբեջանին աջակցելու մասին, ինչպես նաև շարունակել է Հայաստանին մեղադրել «օկուպացիայի» մեջ։ Նրա խոսքով ՝ անհնար է հաջողության հասնել բանակցությունների սեղանի շուրջ՝ չլինելով ուժեղ մարտի դաշտում։
«44-օրյա պատերազմի արդյունքում Ղարաբաղը կրկին ազատագրվեց, և 30-ամյա օկուպացիան ավարտվեց։ Մենք ամեն ջանք գործադրում ենք, որպեսզի այս պատմական հնարավորությունը իրացվի։ Զգալի հաջողությունների ենք հասել Կովկասում կայուն խաղաղության հաստատման գործում։ Շատ կառուցողական զրույց ունեցանք Փաշինյանի հետ։ Ես հավատում եմ, որ մոտ ժամանակներս մեր տարածաշրջանը կկայունանա, Եթե Հայաստանն արձագանքի մեր կոչերին», - հավելել է նա։
Նշենք, որ Նիկոլ Փաշինյանն ու Ռեջեփ Էրդողանն առաջին հեռախոսազրույցն ունեցել են հուլիսի 11-ին, որի ընթացքում հույս են հայտնել, որ հուլիսի 1-ին Հայաստանի և Թուրքիայի հատուկ ներկայացուցիչների միջև ձեռք բերված պայմանավորվածությունները կյանքի կկոչվեն առաջիկայում:
Հիշեցնենք` Երևանն ու Անկարան 2021 թվականի դեկտեմբերին հայտարարեցին, որ պատրաստ են հարաբերությունների կարգավորման հստակ քայլեր ձեռնարկել, և երկուստեք հատուկ ներկայացուցիչներ նշանակեցին. Անկարան՝ Վաշինգտոնում Թուրքիայի նախկին դեսպան Սերդար Քըլըչին, իսկ Հայաստանը՝ Ազգային ժողովի նախագահի տեղակալ Ռուբեն Ռուբինյանին։
Ավելի ուշ ԱԳՆ-ն հայտարարեց, որ կողմերը համաձայնել են շարունակել լիարժեք կարգավորման բանակցությունները՝ առանց նախապայմանների։
Հայաստան-Թուրքիա կարգավորման գործընթացի շրջանակում երկու երկրների հատուկ ներկայացուցիչների առաջին հանդիպումը կայացավ հունվարի 14-ին Մոսկվայում, մյուս երեքը` փետրվարի 24-ին, մայիսի 3-ին և հուլիսի 1-ին Վիեննայում։