ԵՐԵՎԱՆ, 2 օգոստոսի - Sputnik. Հնդկաստանի Չեննայ քաղաքում շարունակվող շախմատի Համաշխարհային օլիմպիադայի 5-րդ տուրում Հայաստանի հավաքականը մրցեց Անգլիայի հավաքականի հետ և հաղթանակ տարավ 2,5:1,5 հաշվով։
Գաբրիել Սարգսյանը ոչ ոքի խաղաց Մայքլ Ադամսի, Սամվել Տեր-Սահակյանը՝ Դևիդ Հաուելի, Ռոբերտ Հովհաննիսյանը՝ Գևեյն Ջոնսի հետ։ Հաղթական միավորը բերեց երկրորդ համար Հրանտ Մելքումյանը, որը սպիտակներով պարտության մատնեց Լյուկ Մաքշեյնին։
Հայաստանի հավաքականը Հնդկաստանի երկրորդ թիմի հետ 10-ական միավորով կիսում է առաջին տեղը՝ նախորդ տուրերում հաղթելով Մադագասկարին (4:0), Անդորրային (3:1), Եգիպտոսին (2,5:1,5) և Ավստրիային (3:1)։
Կանանց Հայաստանի հավաքականը 5-րդ տուրում մրցեց Ինդոնեզիայի թիմի հետ և առավելության հասավ 3:1 հաշվով։ Հաղթանակներ տարան Աննա Սարգսյանն ու Մարիամ Մկրտչյանը։ Էլինա Դանիելյանն ու Լիլիթ Մկրտչյանը խաղացին ոչ ոքի։
Կանանց թիմը 8 միավորով բաժանում է 7-17-րդ տեղերը։
Առաջին չորս տուրերում հայ շախմատիստուհիները պարտության էին մատնել Բոցվանային (4:0), Նորվեգիային (4:0), Իռլանդիային (4:0), պարտվել Էստոնիային (1,5:2,5)։
Շախմատի համաշխարհային օլիմպիադայում Հայաստանի տղամարդկանց հավաքականը ներկայացնում են գրոսմայստերներ Գաբրիել Սարգսյանը, Հրանտ Մելքումյանը, Ռոբերտ Հովհաննիսյանը, Սամվել Տեր-Սահակյանը, Մանուել Պետրոսյանը: Կանանց հավաքականում են Էլինա Դանիելյանը, Լիլիթ Մկրտչյանը, Աննա Սարգսյանը, Մարիամ Մկրտչյանը և Սուսաննա Գաբոյանը:
44-րդ շախմատային օլիմպիադան անցկացվում է Հնդկաստանի Չեննայ քաղաքում հուլիսի 29-ից օգոստոսի 10-ը։ Կանցկացվի 11 տուր։
Հիշեցնենք, որ շախմատի օլիմպիադայում Հայաստանը հաղթել է երեք անգամ ՝ 2006, 2008, 2012 թվականներին: