ԵՐԵՎԱՆ, 2 օգոստոսի – Sputnik. Երևանի ընդհանուր իրավասության դատարանում այսօր ՀՅԴ անդամ Գերասիմ Վարդանյանի գործով դատական նիստին նրա պաշտպան Բենիկ Գալստյանը դատարանին միջնորդություն է ներկայացրել իր պաշտպանյալին կալանքից ազատելու վերաբերյալ։
Նշենք, որ Վարդանյանին ազատ արձակելու համար երաշխավորությամբ էին հանդես եկել ԱԺ «Հայաստան» խմբակցության պատգամավորներ Արամ Վարդևանյանը, Աշոտ Սիմոնյանը, Աննա Գրիգորյանը և Մաթևոս Ավետիսյանը։
Պաշտպանը միջնորդել է կա՛մ կիրառել գրավ՝ 3 միլիոն դրամի չափով, կա՛մ անձնական երաշխավորությամբ ապահովել նրա ազատ արձակումը։
«Եթե դատարանը գտնի, որ հնարավոր չէ երաշխավորությամբ ապահովել նրա պատշաճ վարքագիծը, ապա միջնորդում ենք նաև նրա նկատմամբ ընտրված խափանման միջոց կալանավորումը փոխարինել գրավով»,–ասել է Գալստյանը։
Դատարանը լսելով կողմերին՝ մերժել է ներկայացված միջնորդությունը։
Գերասիմ Վարդանյանը մեղադրվում է 2020-ի նոյեմբերի 9-ին տեղի ունեցած իրադարձությունների առթիվ հարուցված քրեական գործի շրջանակում` զանգվածային անկարգություններ կազմակերպելու և լրագրողի աշխատանքը խոչընդոտելու համար:
Հիշեցնենք, որ մինչ կալանքը Գերասիմ Վարդանյանի նկատմամբ խափանման միջոց էր ընտրվել 60 միլիոն ՀՀ դրամ գրավը։ Փաստաբանը Sputnik Արմենիայի հետ զրույցում հայտնել էր` գրավի գումարը չեն վճարել, քանի որ այդքան գումար, բնականաբար, չունեն։ Վարդանյանը մայիսի 12-ին կալանավորվել էր։