Հայրենիքի պաշտպանության ժամանակ զինհաշմանդամություն ձեռք բերած տղաներից 5–ը կապել են շուրջ մեկ տարի գործվող «Արևագորգի» վերջին հանգույցները:
Նշենք, որ Զինծառայողների ապահովագրության հիմնադրամի (ԶԱՀ) և «Մեգերյան կարպետ»-ի համատեղ «Կապիր, որ․․․» խորագրով նախաձեռնությունը մեկնարկել է 2021թ․ հունիսի 4-ին, որի շրջանակում յուրաքանչյուր ոք կարող էր «Արևագորգի» իր հանգույցը կապել և ամեն մի հանգույցի դիմաց նվիրաբերել 1,000 ՀՀ դրամ ՝ այդպիսով օգնելով վիրավոր զինծառայողներին և նրանց ընտանիքներին։
«Արևագորգ»
© Sputnik / Artak Aghababyan
Միջոցառման ժամանակ զինհաշմանդամություն ձեռք բերած Ռուսլան Թումանյանը, Արթուր Հովհաննիսյանը, Արթուր Կարապետյանը, Նորայր Ավագյանը և Սեյրան Սողոյանը սկզբում կապել են գորգի հանգույցները, այնուհետև կտրել։
«Արևագորգը» պատկանում է Արցախի Ջրաբերդ գավառի գորգերի շարքին։ Գորգի կենտրոնում պատկերված է ծաղկած խաչ, որն արևի ճառագայթներով է շրջապատված` որպես արևի և լույսի խորհրդանիշ և պաշտպանիչ ուժ:
Մոտ մեկ տարվա ընթացքում բազմաթիվ անհատներ, կազմակերպություններ, դպրոցականներ ու հանրահայտ անձինք ամեն օր այցելում էին ցուցասրահ ու կապում գորգի իրենց հանգույցը։ Սփյուռքում ապրողները վիրտուալ հանգույցներ էին կապում megerian.1000plus.am կայքի միջոցով։
Այս նախաձեռնության շնորհիվ հավաքագրվեց 8,123,000 ՀՀ դրամ։
«Արևագորգը» տեղափոխվել է «Մեգերյան կարպետ»՝ անցնելու հատուկ լվացման և մշակման գործընթացը, որից հետո այն կվաճառվի աճուրդով և ամբողջ հասույթը «Մեգերյան կարպետ» կողմից կփոխանցվի ԶԱՀ-ին։
ԶԱՀ-ի միջոցները գոյանում են Հայաստանում ու Արցախում եկամուտ ստացող անձանց ամսական պարտադիր վճարներից, ինչպես նաև կամավոր նվիրաբերություններից, որոնք ստանում ենք աշխարհասփյուռ հայությունից։