Խերսոնի մարզի իշխանություններն ուկրաինական զորքի հերթական գրոհից հետո փակել են Անտոնովի կամրջի երթևեկությունը։
Դնեպրի վրայով անցնող 1366 մետր երկարություն ունեցող Անտոնովի կամուրջը կառուցվել և շահագործման է հանձնվել 1985 թվականին։ Լայնությունը 25 մետր է, բաղկացած է 30 կամրջամասից։ Մինչ կամրջի կառուցումը Խերսոնի մարզում ավտոտրանսպորտային միջոցները ձախ ափ կարող էին հասնել կա՛մ Կախովսկայա ՀԷԿ-ի ամբարտակով, կա՛մ լաստանավով։
ՌԴ զինվորականները հատուկ գործողությունների ընթացքում վերահսկողության տակ են առել Խերսոնի մարզն ու Զապորոժիեի մարզի մերձազովյան մասը։ Մարզերում վարչակազմեր են ձևավորվել, սկսել են հեռարձակվել ռուսական հեռուստաալիքներ և ռադիոկայաններ, վերականգնվում է Ղրիմի հետ առևտրային հաղորդակցությունը։ Մարզերը հայտարարել են ՌԴ սուբյեկտներ դառնալու ծրագրերի մասին։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռուսաստանցիներին ուղղված հեռուստաուղերձում նա ասաց, որ հանգամանքները վճռական և անհապաղ գործողություններ են պահանջում։
Ուկրաինայում մարտական գործողություններն ընթանում են արդեն 154-րդ օրը։