ԵՐԵՎԱՆ, 25 հուլիսի – Sputnik. ՀՀ ազգային անվտանգության ծառայությունը առանձնապես խոշոր չափերով հարկեր չվճարելու դեպք է բացահայտել, հայտնում են ԱԱԾ մամուլի ծառայությունից։
Մասնավորապես պարզվել է, որ «Վերնիսաժ» տոնավաճառի վարձակալ հանդիսացող ՍՊԸ ղեկավարն ու պատասխանատու այլ անձինք, 2019-2022 թվականների ընթացքում տոնավաճառի տարածքում առկա տաղավարները մեկ գծամետրը օրական 1000 ՀՀ դրամով փաստացի ենթավարձակալության հատկացնելով տարբեր ֆիզիկական և իրավաբանական անձանց, նրանց մի մասին ընդհանրապես ՀԴՄ կտրոններ չեն տրամադրել, իսկ մյուս մասից կանխիկ ստանալով 1000 ՀՀ դրամ վարձավճար՝ տրամադրել են 500 ՀՀ դրամ ստանալու վերաբերյալ կտրոններ։ Այդ կերպ թաքցրել են ընկերության իրական շրջանառությունը` ընդհանուր չվճարելով 233,5 միլիոն ՀՀ դրամի չափով հարկ:
Առանձնապես խոշոր չափերով հարկերը չվճարելու դեպքի առթիվ ՀՀ ԱԱԾ քննչական դեպարտամենտում ՀՀ քրեական օրենսգրքի 290-րդ հոդվածի 3-րդ մասի 1-ին և 2-րդ կետերով (Հարկերը, տուրքերը կամ այլ վճարներ չվճարելը) նախաձեռնվել է քրեական վարույթ, որի քննչական ենթակայության հարցը որոշելու համար ուղարկվել է հսկող դատախազին: