ԵՐԵՎԱՆ, 23 հուլիսի – Sputnik. Ընդդիմությունը սեպտեմբերին կգնա՞ խորհրդարան, թե՞ ոչ։ «Հայաստան» խմբակցության քարտուղար Արծվիկ Մինասյանը Sputnik Արմենիայի հետ զրույցում ասաց, որ այս թեման շեղում է իրենց հիմնական խնդրից` Հայաստանի և Արցախի անվտանգությունը, պետականությունը փրկելու հարցից։
«Արհեստական ձևակերպում է` ընդդիմությունը կգնա՞ խորհրդարան, թե՞ ոչ։ Ընդդիմությունը քանիցս հայտարարել է, որ ԱԺ աշխատանքներին մասնակցելը մեկ նպատակ ունի` սպասարկել Հայաստանի և Արցախի ազգային անվտանգության օրակարգերը, շահերն առաջ մղել, որի գլխավոր խոչընդոտը գործող իշխանությունն է։ Այս օրակարգով մենք միշտ էլ ասում ենք, որ ԱԺ–ում անելիք կա` օրենսդրական նախաձեռնությունների, միջազգային հարթակներում այս հարցերը բարձրացնելու տեսքով, սակայն ոչ երբեք պարգևավճարներ տալու թեմայով գնալ ԱԺ»,– ընդգծեց Մինասյանը։
Նրա խոսքով` նախորդ 1 տարվա ընթացքում բազմիցս ասել են, որ ընդդիմադիրների բերած` ՀՀ–ի ու Արցախի անվտանգությանը վերաբերող բոլոր հարցերով գործող իշխանությունը կա՛մ բացահայտ արհամարհանք է ցուցաբերել, կա՛մ օգտվել է իր քանակական մեծամասնությունից` հրաժարվելով գնալ քննարկմանը։ Ամենափայլուն օրինակը, ըստ Մինասյանի, հունիսի 3-ին էր, երբ մեծամասնությունն ուղղակի հրաժարվեց գնալ ԱԺ նիստին և քննարկել այն կարմիր գծերը, որոնք անհրաժեշտ են Թուրքիայի և Ադրբեջանի հետ հարաբերությունների ժամանակ։
Հավելենք, որ երեկ «Հայաստան» խմբակցության պատգամավոր Իշխան Սաղաթելյանը հարցազրույց էր տվել, որը հրապարակվել էր հետևյալ վերնագրով. «Ընդդիմությունը սեպտեմբերին կգնա խորհրդարան, բայց իր օրակարգով»։ Հարցազրույցը տարածվել էր նաև ՀՅԴ պաշտոնական կայքում։ Ավելի ուշ հարցազրույցի վերնագիրը փոխել են։ Այսօր Արցախի ԱԺ նախագահ Արթուր Թովմասյանը հայտարարություն է տարածել` ողջունելով ՀՀ ԱԺ ընդդիմադիր խմբակցությունների՝ սեպտեմբերին խորհրդարան վերադառնալու և պատգամավորական աշխատանքը շարունակելու որոշումը։ Դրանից հետո «Հայաստան» խմբակցության պատգամավորները սոցցանցերում գրառումներ են անում և նշում` ցավալի է, որ նման մակարդակում սուտ տեղեկություն է տարածվում, թե իբր իրենք սեպտեմբերին ԱԺ են գնալու։