ԵՐԵՎԱՆ, 21 հուլիսի – Sputnik. Թուրքիայի խորհրդարանի խոսնակ Մուստաֆա Շենթոփն անդրադարձել է «Զանգեզուրի միջանցքի» թեմային։
Նա հայտարարել է, որ դրա բացումը նոր հնարավորություններ կստեղծի Ադրբեջանի, Թուրքիայի և Պակիստանի համար: Ինչպես հայտնում են ադրբեջանական լրատվամիջոցները՝ այս մասին նա խոսել է Ստամբուլում երեք երկրների օրենսդիր մարմինների ղեկավարների երկրորդ եռակողմ նիստի ժամանակ։
Շենթոփի խոսքով՝ երեք երկրների ժողովուրդներին կապում են «պատմական և մշակութային սերտ կապերը»։
Նշենք, որ Շենթոփն առաջին անգամ չէ, որ հրապարակային հայտարարությամբ է հանդես գալիս «Զանգեզուրի միջանցքի» մասին։ Նախորդ տարի Անկարայում Ադրբեջանի հաղթանակին նվիրված ցուցահանդեսի բացման ժամանակ նա կրկին խոսել էր միջանցքի մասին՝ ընդգծելով, որ այն իր ներդրումը կունենա համաշխարհային առևտրի համար։
Շենթոփը շեշտել էր, թե Անկարան Երևանից ակնկալում է «համարձակ և կառուցողական քայլեր»։
Թուրքիայի ԱԳՆ Մևլութ Չավուշօղլուն էլ այսօր ասել էր, որ Հայաստանը պետք է որոշ հստակ քայլեր անի, այդ թվում՝ Զանգեզուրի նախագծի, համապարփակ խաղաղության պայմանագրի վերաբերյալ։