ԵՐԵՎԱՆ, 21 հուլիսի – Sputnik. Հայաստանի ազգային ագրարային համալսարանը Ռուսաստանի պետական ագրարային համալսարանի` Կ.Ա. Տիմիրյազևի անվան Մոսկվայի գյուղատնտեսական ակադեմիայի հետ հաջողությամբ ավարտեց գինեգործության վերաբերյալ համատեղ առցանց դասընթացը։
«Սա մեր առաջին ուսումնական նախագիծն է, որի փորձը կտարածենք նաև ԵԱՏՄ երկրների մյուս բուհերի վրա։ Մենք ձգտում ենք ԵԱՏՄ ամբողջ տարածքի ուսումնական հաստատություններում ուսանողներին և դասախոսներին հասանելիություն ապահովել ժամանակակից ենթակառուցվածքներին և առաջատար մշակումներին»,- Sputnik Արմենիայի հետ զրույցում հայտարարեց ԵՏՀ ագրոարդյունաբերության քաղաքականության դեպարտամենտի տնօրեն Արմեն Հարությունյանը։
Ագրոարդյունաբերական համալիրի համար բարձր որակավորում ունեցող կադրերի պատրաստումը բավական արդիական է դառնում։ Այդ պատճառով, ըստ Հարությունյանի, ԵՏՀ ագրոարդյունաբերական բլոկն ուզում է միության երկրների բուհերի միջև ակադեմիական փորձի փոխանակումն ամրապնդել` զարգացնելով ինչպես ֆիզիկական, այնպես էլ վիրտուալ ակադեմիական մոբիլություն։
Գինեգործության փորձնական դասընթացը վիրտուալ էր` Հայաստանի ագրարային համալսարանի և Տիմիրյազևի անվան համալսարանի դասախոսներն առցանց ռեժիմով փոխադարձ հետաքրքրություն ներկայացնող առարկաներից դասախոսություններ էին կարդում։ Այժմ ԵՏՀ-ն առկա ձևաչափով նախագծերի անցկացման հնարավորություններ է մշակում` ներգրավելով ագրոարդյունաբերության համալիրի ձեռնարկությունների, որպեսզի ուսանողները կարողանան դրանցում պրակտիկա անցնել։
Վերջերս ԵՏՀ-ի հարթակում ոլորտային խորհրդակցություն էր կայացել, որի ընթացքում Հայաստանի, Բելառուսի, Ղրղզստանի և Ռուսաստանի ագրարային բուհերի դասախոսները ցանկություն էին հայտնել հաջորդ կիսամյակում սելեկցիայի և սերմնաբուծության գծով կադրեր պատրաստել։
Հեռանկարում դիտարկվում են ուսումնասիրության նաև այլ ուղղություններ, օրինակ` հողագործության մեջ մեծ տվյալների (big data) կիրառում։ Այստեղ կրկին իր փորձը կարող է ներկայացնել Հայաստանի ագրարային համալսարանը, որտեղ վերջերս ճշգրիտ հողագործության համար անօդաչու սարքերի լաբորատորիա է բացվել։
Հարությունյանը, ամփոփելով, նշել է, որ կրթական համատեղ նախագծերի իրականացումը թույլ կտա ԵԱՏՄ-ում բարձրացնել ագրարային կրթության գրավչությունն ու մակարդակը, ինչպես նաև գիտելիքներ ձեռք բերել` ուղղված բիզնեսի պրակտիկ կարիքներին։