ԵՐԵՎԱՆ, 21 հուլիսի – Sputnik. Կառավարությունը հաստատեց ՀՀ դատական և իրավական բարեփոխումների 2022-2026 թվականների ռազմավարությունը և դրանից բխող գործողությունների ծրագիրը:
Արդարադատության նախարար Կարեն Անդրեասյանը նշեց, որ ռազմավարության մեջ մի քանի կարևոր դրույթներ ունեն, որոնցից առաջինը դատական համակարգի բարեփոխումն է, որով նախատեսվում է հակակոռուպցիոն դատարանների ողջ շղթայի գործարկումը։ Նրա խոսքով` համակարգը գրեթե ամբողջությամբ պատրաստ է, և առաջիկայում 3 ատյաններում հակակոռուպցիոն դատարաններ կգործեն։
«Դատարանների և դատական գործերի թվայնացումը նույնպես ընդգրկված է ռազմավարության մեջ։ Ինչը նշանակում է, որ փաստաբանները կարող են իրենց գրասենյակներից հայցադիմումներ, ապացույցներ ներկայացնել, կարող են նաև օնլայն դատական քննություններ անցկացվել։ Բացի այդ, ռազմավարության մեջ նշել ենք նաև, որ կստուգվի բոլոր դատավորների, քննիչների, ՔԿՀ աշխատակիցների բարեվարքությունը»,–ասաց Անդրեասյանը։
Նախարարի խոսքով` նախատեսվում է նաև, որ սոցիալապես անապահովներն անվճար իրավաբանական խորհրդատվություն կստանան։ Բացի այդ, առաջիկայում կստեղծվի մասնավոր արբիտրաժային կենտրոն, որտեղ լուծվելու են ոչ միայն մասնավոր, ներազգային խնդիրներ, այլ նաև այն կարող է դառնալ տարածաշրջանային կենտրոն։ Նախատեսվում է նաև, որ քաղաքացիները նոտարիատ գնալու կարիք չեն ունենա` կարող են օնլայն ստանալ իրենց անհրաժեշտ ծառայությունները։