ԵՐԵՎԱՆ, 17 հուլիսի – Sputnik. Հայաստանի հավաքականի նախկին առաջատար, այժմ ԱՄՆ-ն ներկայացնող Լևոն Արոնյանը հաղթել է FTX Road of Miami շախմատային օնլայն մրցաշարի եզրափակիչ խաղի առաջին սեթում:
Հայ շախմատիստը չորս պարտիաներում առավելության է հասել չինացի գրոսմայստեր Վեյ Իի նկատմամբ՝ 2,5: 1,5 հաշվով: Արոնյանը հաղթել է մեկ պարտիայում, իսկ 3-ն ավարտել ոչ-ոքի։ Այսօր կխաղարկվի չորս պարտիաներից բաղկացած երկրորդ սեթը։ Չինացի շախմատիստի հաղթանակի դեպքում հաղթողը կորոշվի թայ-բրեյքում:
Քառորդ եզրափակիչում ու կիսաեզրափակիչում Լևոն Արոնյանը հաղթել է համապատասխանաբար՝ հնդիկ գրոսմայստեր Արջուն Էրիգաիսիին (2,5: 1,5) ու լեհ Յան-Կշիշտոֆ Դուդուին (3:1):
Մրցաշարի նախնական փուլում Լևոն Արոնյանը 16 շախմատիստների մասնակցությամբ գրավել է 7-րդ տեղը: Առաջինը ամերիկահայ Սամուել Սևյանն էր։ Քառորդ եզրափակիչում Սևյանը պարտվել է Վեյ Իին:
FTX Road to Miami մրցաշարը Meltwater Champions Chess Tour շարքի հերթական փուլն է: Մրցաշարի մրցանակային ֆոնդը կազմում է 150 հազար դոլար: