Ճապոնիայի նախկին վարչապետ Սինձո Աբեին սպանողը 2005 թվականին փորձել է ինքնասպան լինել

ԵՐԵՎԱՆ, 15 հուլիսի – Sputnik. Ճապոնիայի նախկին վարչապետ Սինձո Աբեին սպանած 41-ամյա Տեցույա Յամագամին փորձել է ինքնասպան լինել 2005 թվականին, երբ ծառայում էր ինքնապաշտպանության ռազմածովային ուժերում։ Այս մասին հայտնում է ՌԻԱ Նովոստին` հղում անելով «Կիոդո» գործակալությանը, որը զրուցել է մեղադրյալի ազգականի հետ։

Գործակալության տվյալներով` այն բանից հետո, երբ 1984 թվականին ինքնասպան էր եղել նրա հայրը, մայրը «Միավորման եկեղեցի» կրոնական կազմակերպության անդամ է դարձել, նվիրաբերելով կազմակերպությանը 100 մլն իեն (այն ժամանակվա փոխարժեքով գումարը համարժեք էր մոտ 1 մլն դոլարի)` ամուսնու մահից հետո ստացած ապահովարգավճարի և հողի ու ունեցվածքի վաճառքից ստացած գումարների հաշվին։ 2002 թվականի սկզբին մայրն իրեն սնանկ ճանաչեց։

Ինչպես հայտարարել է Աբեին սպանող Յամագամիի հարազատը, այդ նվիրատվություններն ու հետագա սնանկությունը քանդել են նրա ընտանիքը ու կործանել նրա ապագան. նա չի կարողացել ընդունվել հեղինակավոր համալսարան։ Գրանցվել է Ճապոնիայի ինքնապաշտպանության ռազմածովային ուժերում և 2005 թվականին ծառայության ժամանակ փորձել է ինքնասպան լինել, որպեսզի իր եղբայրն ու քույրը ստանան ապահովագրավճարները։

Ավելի վաղ Յամագամին պատմել էր, որ Աբեին համարում է «Միավորման եկեղեցու» հետ կապ ունեցող անձ, քանի որ նախկին վարչապետն անցած տարի ողջույնի ուղերձ էր հղել այդ եկեղեցու բարեկամ կազմակերպությանը։

Բացի այդ, Յամագամին հայտարարել էր, որ Աբեի պապը` նախկին վարչապետ Նոբուսուկե Կիսին, իբր նպաստել է Ճապոնիայում կրոնական այդ կազմակերպության հայտնվելուն։

Սինձո Աբեի դեմ հարձակումը տեղի է ունեցել հուլիսի 8-ին ճապոնական Նարա քաղաքում, երբ նախկին վարչապետը ելույթ էր ունենում փողոցում։ Հարձակվողը՝ 41-ամյա Տեցույա Յամագամին, երկու կրակոց է արձակել քաղաքական գործչի թիկունքին մոտ 10 մետր հեռավորությունից: Աբեին տեղափոխել են Նարայի բժշկական համալսարանի հիվանդանոց, որտեղ 5 ժամ անց նա մահացել է։ Քաղաքական գործիչը 67 տարեկան էր։