Հերթական թիրախը ուսանողներն ու աշակերտներն են, «սորոսականները» ակտիվացել են ՀՀ–ում. «Փաստ»

ԵՐԵՎԱՆ, 14 հուլիսի – Sputnik. Ոչ միայն երիտասարդությանը, այլև աշակերտներին թիրախավորող ծրագրերում սկսել են ակտիվանալ Հայաստանի՝ արևմտյան ֆինանսավորմամբ հայտնի «սորոսական» մի շարք ՀԿ-ներ: Տեղեկությունը հայտնում է «Փաստ» օրաթերթը։

Հուլիսի 8-ին հայտնել էինք, որ ԱՄՆ-ն պատրաստվում է 585 հազար դոլար հատկացնել Հայաստանի, Ադրբեջանի և Վրաստանի ուսումնական հաստատությունների մինչև 24 տարեկան 60 ուսանողների և շրջանավարտների պատրաստման ծրագրի համար: Հատկանշական է, որ դասընթացը պատրաստվում են անցկացնել այն ոլորտներում, որոնք ներառում են, այսպես կոչված, «առաջնորդական որակների զարգացումը», ինչպես նաև տարածաշրջանի «երիտասարդների միջև երկխոսության» հաստատումը: Այդ նախաձեռնությունը վերահսկելու է Ադրբեջանում ԱՄՆ–ի դեսպանատունը:

Պարբերականի աղբյուրը տեղեկացրել է, որ անցկացվող թրեյնինգների ժամանակ հիմնականում հրամցնում են «ճիշտ» ու «ազատ» քաղաքացի դաստիարակելու, պետություն–քաղաքացի հարաբերությունների մասին դասախոսություններ, ինչպես նաև լիբերալ այլ արժեքներ քարոզող տարբեր խաղեր։

Ձեռքի հետ աշակերտներին «կրթում» են «խաղաղության», տարածաշրջանում «սերտ համագործակցության» գաղափարներով: