15-ամյա գյումրեցի պատանին բեմադրել է «Լոռեցի Սաքոն»

Գյումրիի Մտորումների թատրոնը, որպես փորձարարական հարթակ, իր դռները միշտ բաց է պահում երիտասարդ ստեղծագործողների համար։ Վերջին օրերին թատրոնի խաղացանկում «Լոռեցի Սաքոն» է: Պատանի ռեժիսորի` 15-ամյա Սերգեյ Եղիկյանի ներկայացումը ոչ միայն հուզում, այլ նաև իր որակով զարմացնում է հանդիսատեսին։ Հետաքրքիր նկարչական ու ձայնային ձևավորումը, պատանի դերասանների խաղն ու հղկված խոսքը հանդիսատեսին «ստիպում է» լարված մնալ ողջ ներկայացման ընթացքում:

Գյումրու Վ.Աճեմյանի անվան դրամատիկական թատրոնի վաստակավոր արտիստ Հովհաննես Հովհաննիսյանը այս ներկայացումը տարբերվող է համարում, հատկապես, որ ռեժիսորը 15-ամյա պատանի է: «Բավական բարդ գործ է ներկայացված, բայց Սերգեյը զարմանալիորեն կարողացել է իր առջև դրված խնդիրը կատարել։ Իսկ բեմադրության լավ գնահատականը հանդիսատեսի այցն ու շարունակական ներկայացումներն են»,- նշում է Հովհաննես Հովհաննիսյանը:

Sputnik Արմենիայի հետ զրույցում պատանի ռեժիսորն ասում է, որ չնայած ապրում ենք զարգացած դարաշրջանում, բայց խավարամտությունն ու սնահավատությունը հիմա ավելի շատ են տարածված: «Սա բեմադրելով նպատակ եմ ունեցել երիտասարդներին նման երևույթներից հեռու պահել»,- ասում է Սերգեյ Եղիկյանը։

Չցանկանալով կոտրել թումանյանական ոգին՝ պատանի ռեժիսորը պիեսի չի վերածել պոեմը։ «Իմ ընկերներն են մարմնավորել Սաքոյի, չարքերի ու Նանիի կերպարները։ Ի դեպ, Նանիի կերպարը ես անձամբ եմ որոշել զարգացնել՝ Թումանյանի մոտ այդպես չէ»,- ասում է Սերգեյն ու հավելում, որ նախնական տարբերակը 5 անգամ փոփոխության է ենթարկվել:

Ներկայացման մեջ զբաղված պատանիները նշում են՝ առանց երկմտելու են համաձայնել այս կամ այն դերը խաղալ: «Խաղացած ամեն մի նոր ներկայացում մեզ ավելի է մոտեցնում ու հարազատ դարձնում իրար և այդ ստեղծագործությանը: Սա մեր առաջին մեծ ու լուրջ ներկայացումն է»,- ասում է 16-ամյա Արմեն Կուրղինյանը:

Գլխավոր դերակատարը՝ Սամվել Հարությունյանը, պատմում է՝ առաջին մի քանի ներկայացումները պարզապես խաղացել է, հիմա արդեն զգում է դերը: «Իրականում դժվար է խաղալ խենթի կերպարն ու այդ հոգեվիճակն ի ցույց դնել հանդիսատեսին, բայց, կարծում եմ, պարբերական ներկայացումները խոսում են այն մասին, որ գործը հաջողված է»:

Հավելենք, որ «Լոռեցի Սաքոն» ներկայացված է «Նռան հատիկ» մանկապատանեկան հանրապետական թատերական մրցույթ-փառատոնին: