Ներկայումս որոշ կազմակերպիչների կողմից շահագործվում են կեղծ խաղային սարքավորումներ և ծրագրային ապահովման միջոցներ, ինչի արդյունքում անհնար է դառնում հսկել իրական դրամական հոսքերը, կատարված խաղադրույքները։ Այս պարագայում խնդիրներ են առաջանում փաստացի իրացման շրջանառությունների մեծության որոշման և հարկվող օբյեկտների արժանահավատության հետ կապված։ Այս մասին Sputnik Արմենիայի հետ զրույցում ասաց ՊԵԿ աշխատակից Գոհար Զաքարյանը։
Նրա պնդմամբ` «Խաղային գործունեության կարգավորման մասին» ՀՀ օրենքի նախագիծն ընձեռում է առկա խնդիրների լուծման հնարավորություն` արդիական դարձնելով ոլորտում բարեփոխումներ անցկացնելու հարցը։
Նշենք, որ ՊԵԿ-ը հանրային քննարկման է ներկայացրել «Խաղային գործունեության կարգավորման մասին» ՀՀ օրենքի նախագիծը, որով սահմանվում են խաղերին մասնակցելու սահմանափակումները: Նախագիծը զետեղված է իրավաբանական ակտերի նախագծերի հրապարակման միասնական կայքում։
«Ոլորտի կարգավորման առաջիկա քայլերից են համապատասխան օրենսդրական փոփոխությունների մշակումը և պարտադիր տեխնիկական ստանդարտների ներդրումը։ Նախագծում առանցքային տեղ է զբաղեցնում քաղաքացիների շահերի պաշտպանությունը և «պատասխանատու խաղի» մեթոդաբանությունը»,– պարզաբանեց Զաքարյանը։
Նրա տեղեկացմամբ` արգելվելու է այն քաղաքացիների մասնակցությունը մոլախաղերին, ովքեր օրենքով սահմանված որևէ տեսակի սոցիալական ծրագրի աջակցության, կառավարության որոշմամբ սահմանված որևէ աջակցության ծրագրի շահառու են, օգտվում են պետական բյուջեի ֆինանսավորմամբ կամ համաֆինանսավորմամբ իրականացվող սուբսիդավորման որևէ ծրագրից, հանդիսանում են «Պետական նպաստների մասին» ՀՀ օրենքով նախատեսված որևէ տեսակի նպաստի նպաստառու, ճանաչվել են սնանկ կամ ունեն չներված պարտավորություններ, գտնվում են սնանկության վարույթում, ունեն սպառողական վարկ, որի ընդհանուր ծավալը գերազանցում է տարեկան եկամուտների 40 տոկոսը, հաշվառված են կախվածությունների բուժման ազգային կենտրոնում։
Օրենքով տվյալ խմբերում չընդգրկված քաղաքացիների խաղային մասնակցության թույլատրելի չափ է սահմանվում հայտարարագրված տարեկան եկամուտների 20 տոկոսը։ Սահմանափակվելու են նաև կենսաթոշակառուները, եթե նշանակված կենսաթոշակը նրանց եկամտի միակ աղբյուրն է։
Անդրադառնալով հարցին, թե ինչպես է վերահսկվելու գործընթացը, Զաքարյանն ասաց, որ ստեղծվելու է ոլորտի կարգավորման լիազորված օպերատոր, որն ունենալու է մոնիտորինգային կենտրոն, լինելու է կենտրոնական սերվեր, որին պետք է պարտադիր միացված լինեն կազմակերպիչների խաղային սարքավորումները և ծրագրային ապահովման միջոցները։
«Ռիսկային խմբերում ընդգրկված շահառուների վերաբերյալ տեղեկատվությունը պատկան մարմինները փոխանցելու են օպերատորին և այդ տեղեկատվությունը տեղայնացվելու է կենտրոնական սերվերում։ Կազմակերպիչները խաղացողներին գրանցելու ժամանակ նույնականացնելու ընթացքում իրական ժամանակի ռեժիմով հարցում են ուղարկելու կենտրոնական սերվերին, և եթե անձն այդ ցանկերում ընդգրկված է լինելու, ապա նրա մասնակցությունը խաղերին սահմանափակվելու է»,– մանրամասնեց ՊԵԿ աշխատակիցը։
Զաքարյանի տեղեկացմամբ` օրենքը տարածվելու է ամբողջ խաղային ոլորտի վրա, մասնավորապես` մոլեխաղերի, ինտերնետային մոլեխաղերի, վիճակախաղերի, բուքմեյքերային գործունեության վրա, որոնց նկատմամբ սահմանվելու են պարտադիր պահանջներ ու պայմաններ։ Եթե կազմակերպիչը չի պահպանելու օրենքով սահմանված լիցենզիայի համար նախատեսված պայմաններն ու պահանջները, կիրառվելու են պատասխանատվության միջոցներ։
ՊԵԿ աշխատակցի հավաստմամբ` խախտման դեպքում քաղաքացու մասնակցությունն արգելափակվելու է, իսկ կազմակերպիչը տուգանվելու է։ Շատ դեպքերում պատժամիջոցը կարող է լինել լիցենզիայի կասեցումը կամ ընդհուպ մինչև լիցենզիայի գործողության դադարեցումը։
Հիշեցնենք` 2018 թվականի մարտից խաղային ոլորտի նկատմամբ վերահսկղությունը վերապահվել է ՊԵԿ–ին։