ԵՐԵՎԱՆ, 11 հուլիսի – Sputnik. ՀՀ ԱԺ նախագահի տեղակալ Հակոբ Արշակյանը հուսով է, որ Վերին Լարսի անցակետում ծանր տրանսպորտային միջոցների հերթերի խնդիրը խորհրդարանականների ջանքերով երկարաժամկետ լուծում կարող է ստանալ։ Ինչպես հայտնում է ՀՀ ԱԺ մամուլի ծառայությունը, նա այդ մասին ասել է ՀՀ ազգային ժողովի և ՌԴ դաշնային ժողովի միջև համագործակցության միջխորհրդարանական հանձնաժողովի 35-րդ նիստում, որն այսօր կայացել է Ռուսաստանի Կրասնոյարսկ քաղաքում։
Նշենք, որ Վերին Լարսը ռուս-վրացական սահմանի միակ ցամաքային անցակետն է, որը կապում է երկու երկրները:
«Ցավոք, վերջին մի քանի ամսվա ընթացքում մենք կրկին բախվեցինք անցակետի անցման խնդրին: Առավել շոշափելի էր վնասը բերքահավաքի սեզոնին, որին բախվեցին արտադրողներն ու փոխադրողները»,- ասել է Արշակյանը:
Նա ընդգծել է, որ Ազգային ժողովը հանդես է եկել հարցը խորհրդարանական հսկողության տակ վերցնելու և այդ խնդրի լուծմանը նպաստելու նախաձեռնությամբ:
«Մենք մտադիր ենք նոր թափ հաղորդել Միջխորհրդարանական հանձնաժողովի աշխատանքին` երկկողմ օրակարգը հարստացնելու նոր գաղափարներով և առաջարկներով` կապված երկկողմ և բազմակողմ ձևաչափերով համագործակցության խորացման հետ»,- նշել է նա:
Արշակյանի խոսքով` հայ-ռուսական խորհրդարանական փոխգործակցությունը նպաստում է 2 երկրների միջև դաշնակցային հարաբերությունների զարգացմանը:
«ԱԺ և ԴԺ միջև համագործակցության միջխորհրդարանական հանձնաժողովի արդյունավետ աշխատանքը երկկողմ կապերին հատուկ երանգ է տալիս: Տարեցտարի մեր հանձնաժողովն ընդլայնում է իր գործունեությունը` դառնալով խորհրդարանական փոխգործակցության ամենակարևոր գործոններից մեկը»,- ասել է նա։
ԱԺ նախագահի տեղակալը նաև ընդգծել է, որ Ռուսաստանը միջազգային ասպարեզում Հայաստանի կարևոր ռազմավարական գործընկերներից է։
ԱԺ փոխխոսնակը վստահեցրել է, որ հանձնաժողովի շրջանակում կատարված աշխատանքի արդյունքները կամրապնդեն Հայաստանի և Ռուսաստանի միջև ռազմավարական գործընկերությունն ու փոխգործակցությունը:
ՌԴ ԴԺ Դաշնության խորհրդի նախագահի տեղակալ Յուրի Վորոբյովն անդրադարձել է Ռուսաստանում հայկական սփյուռքի դերին, 2 երկրների տնտեսական և հումանիտար կապերի զարգացման հեռանկարներին:
Նա նշել է, որ մեծ է Ռուսաստանի մասնաբաժինը Հայաստանի արտաքին առևտրային հաշվեկշռում. անցած տարվա ընթացքում երկկողմ ապրանքաշրջանառությունը գերազանցել է 2,5 մլրդ ԱՄՆ դոլարը` ավելանալով գրեթե 13 %-ով:
Նիստի մասնակիցները քննարկել են նաև հայ-ռուսական տնտեսական համագործակցության զարգացմանը վերաբերող, տնտեսական և այլ հարցեր: Անդրադարձ է եղել ԵՏՄ շրջանակում Հայաստանի և Ռուսաստանի համագործակցությանը, այդ թվում` տեղեկատվական տեխնոլոգիաների զարգացման և թվայնացման տեմպերի արագացման ուղղությամբ:
Կարևորվել է Հայաստանում ռուսաց լեզվի և Ռուսաստանում հայոց լեզվի ուսումնասիրությունը, գործարար շփումների ակտիվացումը:
Հայ-ռուսական համագործակցության միջխորհրդարանական հանձնաժողովի 36-րդ նիստը Հակոբ Արշակյանի առաջարկով կանցկացվի Հայաստանում` Ծաղկաձոր քաղաքում: