ԵՐԵՎԱՆ, 11 հուլիսի – Sputnik. ՀՀ ԱԺ նախագահն առաջիկայում հնարավոր է դիմի Սահմանադրական դատարան` ԱԺ ընդդիմադիր պատգամավորներին մանդատներից զրկելու հարցով։
Ըստ ԱԺ պաշտոնական կայքում հրապարակված որոշումների նախագծերի` դրանք պետք է քննարկվեին ԱԺ խորհրդի` հուլիսի 14-ին նախանշված նիստում։
Բայց մամուլում այդ մասին տեղեկությունների հրապարակվելուց հետո խորհրդի նիստի օրակարգը հեռացվեց ԱԺ կայքից։
Խորհրդարանից Sputnik Արմենիային հայտնեցին, որ խորհրդի նիստի օրակարգը կայքում հայտնվել էր սխալմամբ` ժամանակից շուտ, որից հետո հեռացվել է։
«Այս պահին, քանի դեռ նիստի օրը հայտնի չէ, որոշման նախագծերը կայքից հեռացվել են, նիստի օրը հայտնի դառնալուն պես, օրակարգը դարձյալ կհրապարակվի»,– հայտնեցին խորհրդարանից։
Նշենք, որ ԱԺ կայքում հրապարակվել էր նույն բովանդակությամբ 33 որոշման նախագիծ` ԱԺ ընդդիմադիր 33 պատգամավորների վերաբերյալ` բացառությամբ ընդդիմադիր խմբակցության կազմից դուրս եկած անկախ պատգամավոր Իշխան Զաքարյանի և «Պատիվ ունեմ» խմբակցության անդամ Թագուհի Թովմասյանի։