ԵՐԵՎԱՆ, 8 հուլիսի – Sputnik. Տավուշի մարզի Բարեկամավան գյուղի բուժկենտրոնի շենքը տիրազուրկ է, այդ պատճառով հնարավոր չէ վերանորոգել այն։ Այս մասին Sputnik Արմենիայի հարցմանն ի պատասխան ասել են ՀՀ տարածքային կառավարման և ենթակառուցվածքների նախարարությունից։
Ավելի վաղ գրել էինք, որ Բարեկամավանի բնակչության 70%–ը 60 տարեկանից բարձր է, իսկ գյուղի բուժկենտրոնն անմխիթար վիճակում է` պատերը խոնավությունից փլվում են, ծեփամածիկը` թափվում։ Անձրևները լցվում են բուժկետ, ինչի հետևանքով պատերը բորբոսնում են։
Ինչպես առողջապահության նախարարությունից, այնպես էլ ՏԿԵՆ–ից հայտնում են, որ բուժամանկաբարձական կետը տեղակայված է նախկին կենցաղի տան վթարային շենքի մեկ սենյակում։ Այն գտնվում է «Կոթիի գյուղական բժշկական ամբուլատորիա» ՊՈԱԿ–ի ենթակայության տակ։
«Շենքը տիրազուրկ գույք է համարվում, այդ պատճառով հնարավոր չէ իրականացնել վերանորոգման հետ կապված որևէ ծրագիր»,– հայտարարել են ՏԿԵ նախարարությունից։
Նշենք, որ բուժկետում աշխատում է միայն մեկ բուժքույր` անհետաձգելի դեպքերում բուժօգնություն ցուցաբերելու և առողջության առաջնային պահպանման ոլորտում բուժքույրի գործառույթներ իրականացնելու համար։
«Տավուշի մարզպետարանը և Նոյեմբերյանի համայնքապետարանը (գյուղը Նոյեմբերյան համայնքի կազմում է,– խմբ.) աշխատանքներ են տանում խնդրի լուծման նպատակով»,– ասված է հարցման պատասխանում։
Հիշեցնենք` Sputnik Արմենիային ՀՀ առողջապահության նախարարությունն օրեր առաջ հայտնել էր, որ բուժհաստատությունների արդիականացման 2021-2026 թթ. ծրագիրը չի ներառում Տավուշի մարզի Բարեկամավան գյուղի բուժկետի վերանորոգումը։