ԵՐԵՎԱՆ, 6 հուլիսի – Sputnik. ԱԺ «Հայաստան» խմբակցության պատգամավոր, «Վերածնվող Հայաստան» կուսակցության նախագահ Վահե Հակոբյանը պատգամավորական մանդատից հրաժարվելու մտադրություն չունի։ Այս մասին նա հայտնեց Sputnik Արմենիայի հետ զրույցում.
«Օրակարգում այսօր այդպիսի հարց չկա։ Չկա նաև ֆրակցիայից դուրս գալու հարց` թե՛ ինձ մոտ, թե՛ «Վերածնվող Հայաստան» կուսակցության»։
Հակոբյանը նշեց, որ պատգամավորական մանդատը պահպանել-չպահպանելու հարցին կանդրադառնա սեպտեմբերին` ԱԺ նոր նստաշրջանի բացմանը` կախված այդ պահին առկա քաղաքական իրավիճակից։ Թեև չի բացառվում, որ որոշումն ընդունվի նաև մինչև սեպտեմբեր։
«Անգամ այս իներտ երկու ամսվա ընթացքում հնարավոր է, բարձր հավանականություն կա, որ իրադարձություններ կատարվեն, որոնք կտրուկ կամ ոչ կտրուկ փոխեն իրավիճակը»,- ասաց Հակոբյանը։
Հարցին, թե ո՞ր իրադարձությունը կարող է վճռորոշ դառնալ նման որոշում կայացնելու համար, Հակոբյանը պատասխանեց. «Եթե Նիկոլը մեր կյանքից վերանա, ես դուրս կգամ քաղաքականությունից»։
Տեղեկացնենք` «Ժողովուրդ» օրաթերթն այսօր գրել է, որ Հակոբյանը պատրաստվում է առաջիկայում պատգամավորական մանդատը վայր դնել: Հակոբյանն այդ լուրը մանիպուլյացիա որակեց` հավելելով, որ թերթն իրեն այդ հարցով չի դիմել, իսկ միջնորդավորված պատասխանը ներկայացրել է որպես սենսացիա։