ԵՐԵՎԱՆ, 6 հուլիսի – Sputnik. ՀՀ ԱԳ նախարար Արարատ Միրզոյանը վերահաստատել է Հայաստանի դիրքորոշումը՝ շարունակելու Ադրբեջանի հետ բանակցությունները ԵԱՀԿ Մինսկի խմբի համանախագահության միջազգային մանդատի ներքո ԼՂ հակամարտության համապարփակ կարգավորման ուղղությամբ։ Տեղեկությունը հայտնում է ՀՀ արտգործնախարարությունը` հավելելով, որ Միրզոյանն այս թեմային է անդրադարձել Իսպանիայի ԱԳ նախարար Խոսե Մանուել Ալբարես Բուենոյի հետ հանդիպման ժամանակ։
Նշենք, որ Հայաստանի և Իսպանիայի միջև դիվանագիտական հարաբերությունների հաստատման 30-ամյակն է լրանում այս տարի։
«Անդրադարձ ենք կատարել նաև 44-օրյա պատերազմի հումանիտար հետևանքներին: Խոսել ենք Ադրբեջանում ցայսօր պահվող հայ ռազմագերիների, Ադրբեջանի վերահսկողության տակ անցած տարածքներում հայկական մշակութային ժառանգության և հումանիտար բնույթի մնացած այլ խնդիրների մասին»,–ասված է հաղորդագրության մեջ։
Միրզոյանը շեշտել է, որ Հայաստանի կառավարությունը իր կողմից անհրաժեշտ ջանքեր է գործադրում թե՛ տարածաշրջանային ենթակառուցվածքների և տրանսպորտային ուղիների ապաշրջափակման, թե՛ սահմանազատման և սահմանային անվտանգության, թե՛ Հայաստանի և Ադրբեջանի հարաբերությունների, թե՛ ԼՂ հակամարտության կարգավորման ուղղությամբ։
Նա իր գոհունակությունն է հայտնել Հայաստանում ռեզիդենտ դիվանագիտական ներկայացուցչություն հիմնելու վերաբերյալ Իսպանիայի կառավարության որոշման կապակցությամբ։ Միրզոյանը հույս է հայտնել, որ առաջիկայում ներկայացուցչությունը նաև հյուպատոսական ծառայություններ կմատուցի։
Երկու երկրների արտգործնախարարներն անդրադարձել են նաև Հայաստանի և Իսպանիայի միջև առևտրատնտեսական փոխգործակցության զարգացման հեռանկարներին։ Չնայած ապրանքաշրջանառության ծավալները շատ մեծ չեն, սակայն 2021թ.-ին, օրինակ, 2020թ.-ի համեմատ գրանցվել է 36% աճ, իսկ 2022թ. առաջին չորս ամիսների ծավալները 2021թ․-ի համեմատ աճել են գրեթե երեք անգամ:
Միրզոյանը հայ-իսպանական համագործակցության նշանակալի օրինակ է համարել հայկական առաջին արբանյակի արձակումը տիեզերք, ինչը հայկական պետական «Գեոկոսմոս» և իսպանական «Սատլանտիս» ընկերությունների համատեղ աշխատանքի արդյունք է:
Հիշեցնենք, որ Միրզոյանն աշխատանքային այցով Իսպանիայում է գտնվում։ Երեկ ՀՀ արտգործնախարարը հանդիպել է ունեցել Իսպանիայի Պատգամավորների կոնգրեսի նախագահ Մերիչել Բատետի հետ։