ԵՐԵՎԱՆ, 6 հուլիսի – Sputnik. ԱԺ ընդդիմադիր պատգամավորներից մեկն օրերս զանգահարել է ՀՀ գլխավոր զինկոմին ու հարցադրումներ արել, թե ինչ իրավունքով են զորակոչում ընդդիմության երիտասարդ անդամներին։ Այսօր ԱԺ արտահերթ նիստում այս մասին ասաց ՀՀ պաշտպանության նախարար Սուրեն Պապիկյանը` մեկնաբանելով ընդդիմության հայտարարություններն այն մասին, թե զորավարժությունների անվան տակ իշխանությունը զորահավաքների է տանում հիմնականում ընդդիմադիրներին։
«Ընդդիմությունից մի պատգամավոր երևի շփոթել է, որ այլևս չի զբաղեցնում գերատեսչության ղեկավարի կամ ԳՇ պետի պաշտոնը, իրեն իրավունք է վերապահում, զանգում է զինվորականներից մեկին, մասնավորապես` գլխավոր զինկոմին, և ինչ–որ հարցադրումներ անում` ի՞նչ իրավունքով են զորակոչում ընդդիմության երիտասարդներին, պատանիներին։ Ժողովո՛ւրդ, դուք ՀՀ քաղաքացինե՞ր եք, թե՞ ոնց»,– հարցրեց Պապիկյանը։
Նախարարը հիշեցրեց, որ վերջին 1 ամիսը հայտարարված է ինժեներական աշխատանքների մեկամսյակ և ընդդիմությանը կոչ արեց մասնակցել այդ նպատակով իրականացվող եռամսյա հավաքներին։
«Այո՛, գնացեք և մասնակցե՛ք եռամսյա հավաքներին։ Դուք ՀՀ քաղաքացիներ եք, ձեր համակիրները ՀՀ քաղաքացիներ են և հավասար են բոլորին։ Մեր քաղաքացիներն են, մենք չենք տարանջատում նրանց։ Ամոթ է։ Վե՛րջ տվեք։ Ի՞նչ է նշանակում` պաշտպանության նախարարն է հրահանգել։ Նախ` ՊՆ–ն, եթե նախկինում այդպես է եղել, մեր օրերում այդպես չէ, չի կարող զբաղվել նման հարցերով, որովհետև պաշտպանության նախարարն ահագին գործ ունի անելու։ Եվ երկրորդ` մյուս անգամ իրավունք չվերապահեք ձեզ զանգել զինվորականներին»,– ասաց Պապիկյանը։
Նա նաև հայտարարեց, որ ընդդիմության կողմից զինվորականներին ուղղված քողարկված կոչեր են հնչել` հիշեցնելով, որ այդօրինակ կոչերը ենթադրում են նաև քրեական պատասխանատվություն։ Պապիկյանը իրավապահների ուշադրությունը հրավիրեց այդ կոչերի վրա։
Հիշեցնենք` ԱԺ «Հայաստան» խմբակցության անդամ Գեղամ Մանուկյանը հուլիսի 5-ին ֆեյսբուքյան իր էջում գրել էր, որ Սահմանադրության օրվա առիթով «Դիմադրություն» շարժման երթն ուշադիր նկարահանում են, որպեսզի հետո զորակոչի ծանուցագիր ուղարկեն։
2022 թվականի օգոստոսի 1-ից մինչև հոկտեմբերի 30-ը Հայաստանում եռամսյա հավաքներ անցկացնելու որոշումն ընդունվել է կառավարության հունիսի 26-ի նիստում։ Ըստ դրա` վարժական հավաքներին կմասնակցեն մինչև 1444 քաղաքացիներ, որոնցից 1249-ը՝ շարքային և կրտսեր ենթասպայական կազմերի, 65-ը` ավագ ենթասպայական կազմի, 130-ը` սպայական կազմի պահեստազորայիններ` մոտոհրաձգային, կապի, հետախուզական, ինժեներական, հրթիռահրետանային մասնագիտություններով:
Վարժանքների ապահովման նպատակով ՀՀ ռազմատրանսպորտային պարտականություններ ունեցող մարմիններից կներգրավվեն մինչև 134 միավոր տրանսպորտային միջոցներ։