Սահմանամերձ Բարձրունի գյուղի դպրոցում ռմբապաստարան են կահավորել. լուսանկարներ

ԵՐԵՎԱՆ, 3 հուլիսի – Sputnik. Վայոց Ձորի մարզի սահմանամերձ Բարձրունի գյուղում «անվտանգության սենյակ» է կահավորվել:

Դպրոցի տնօրեն Նարինե Ավետիսյանի խոսքով՝ այստեղ սովորում է 31 աշակերտ, 12 դասարաններից չի ձևավորվել միայն 3-րդ դասարանը: Մյուս դասարաններում հիմնականում 1-ից 4 աշակերտ կա (միայն 6-րդ դասարանում՝ 8 երեխա) ։

Հաշվի առնելով սահմանին մոտ լինելը (գյուղը երեք կողմից շրջապատված է Նախիջևանի տարածքով)՝ որոշում է կայացվել դպրոցում ռմբապաստարան կահավորել։

«Կարմիր խաչի օգնությամբ պատրաստվել և վերանորոգվել է «անվտանգության սենյակը»։ Այնտեղ ամեն ինչ կա առաջին օգնություն ցուցաբերելու համար, նստարաններ են տեղադրվել, կան տաք վերմակներ. ամեն ինչ, որպեսզի անհրաժեշտության դեպքում այնտեղ հնարավոր լինի 2-4 ժամ անցկացնել, մինչև օգնությունը հասնի»,-ասում է Ավետիսյանը։

Բացի այդ, սենյակը հագեցած է էլեկտրական մարտկոցներով, որպեսզի հնարավոր լինի լուսավորություն ապահովել:

Դպրոցի հիմնական խնդիրն այս պահին ջեռուցումն է։ Դասարանները ջեռուցվում են էլեկտրական սալիկների օգնությամբ, բայց միջանցքում, զուգարաններում ցուրտ է։

«Կարելի է ասել՝ երեխաները ձմռանը դուրս չեն գալիս դասարաններից»,-նշեց Ավետիսյանը։

Դպրոցում նաև պատուհաններն ու դռները փոխելու կարիք կա։ Իշխանությունները խոստացել են լուծել այս երկու խնդիրներից մեկը։

Մեկ այլ խնդիր` դպրոցական ճաշարանի վերանորոգումը, հաջողվել է լուծել 2020 թվականին ՄԱԿ-ի Զարգացման ծրագրի «Կայուն համայնքներ» նախագծի շրջանակներում, որը ֆինանսավորվում է Ռուսաստանի կողմից։

Իսկ ուսուցիչների մի մասը գյուղի բնակիչներ են, մյուսները գալիս են Վայքից։ Դպրոցում ֆրանսերենի մասնագետ չկա, բայց պայմանավորվել են Գյումրու ուսուցչի հետ, նա տեսակապով դասեր է անցկացնում։ Կարմիր խաչը և մյուս դոնորները դպրոցն ապահովել են դրա համար անհրաժեշտ տեխնիկական միջոցներով, սակայն պարբերաբար խնդիրներ են առաջանում ինտերնետի և լույսի հետ։

Տնօրենը նշում է, որ երեխաները հիմնականում լավ են սովորում։ Նրանք հասկանում են`դպրոցում լավ սովորելը կրթություն ստանալու միակ հնարավորությունն է, գյուղում այլ հնարավորություններ չկան։