Քրեական ոստիկանության ծառայողները Երևանում թմրամիջոցների իրացման դեպքեր են բացահայտել։ Տեղեկությունը հայտնում է ոստիկանության մամուլի ծառայությունը։
Ըստ հաղորդագրության` մայրաքաղաքի տարբեր թաղամասերում հայտնաբերվել ու Նոր Նորքի բաժին են բերման ենթարկել չորս տղամարդու։ Նրանց խուզարկությամբ հայտնաբերվել են ներարկիչներ, որոնցից մեկը՝ սուբուտեքս թմրամիջոցի նմանվող հեղուկով, սրվակներ, «B» գրառմամբ սուբուտեքսի կես հաբ, մեթադոն տեսակի թմրամիջոցի նմանվող հեղուկով տարա ու ծալովի դանակներ:
Պարզվել է, որ նրանց թմրամիջոցներն իրացրել է Նոր Նորքի Մոլդովական փողոցի 40-ամյա բնակիչը։ Նա ևս հայտնաբերվել ու բերման է ենթարկվել։ Անձնական խուզարկությամբ հայտնաբերվել է մեթադոն տեսակի թմրամիջոցի նմանվող հեղուկով տարա և գաղտնի փականով 2 դանակ: Խուզարկվել է նաև 40-ամյա տղամարդու բնակության վայրը, որտեղից հայտնաբերել են մարիխուանայի նմանվող զանգված, մոխրացած հետքերով կաթուցիչ և կշեռք։
40-ամյա տղամարդը կալանավորվել է. դեպքի հանգամանքները պարզվում են։