ԵՐԵՎԱՆ, 28 հունիսի – Sputnik. ԱԺ-ն ավարտեց Վճռաբեկ դատարանի դատավորների թափուր հաստիքների համալրման համար երեկվանից սկսված քվեարկությունները։
Դրանցից մի քանիսը բավական տպավորիչ են։ Օրինակ` Արցախյան 44-օրյա պատերազմին կամավոր մանակցած ու հերոսաբար զոհված Գևորգ Արշակյանի մայրը` Երևանի ընդհանուր իրավասության դատարանի դատավոր Նաիրա Հովսեփյանը, ԱԺ-ում անցկացված փակ գաղտնի քվեարության արդյունքում պարտվեց «Քաղաքացիական պայմանագիր» խմբակցության պատգամավոր, նախկինում փաստաբան Արթուր Դավթյանին։
Դավթյանը ստացել է 67 ձայն, Հովսեփյանը` 0։ Այսպիսով, Դավթյանին կուսակիցներն ընտրեցին Վճռաբեկ դատարանի հակակոռուպցիոն պալատի քաղաքացիական գործերով դատավոր։
Նույն պալատի 2 այլ թափուր հաստիքներում ընտրվեցին Լիպարիտ Մելիքջանյանն ու Գևորգ Գյոզալյանը, դարձյալ միաձայն, համապատասխանաբար՝ 68 և 67 ձայներով։
Հետաքրքիր արդյունք գրանցվեց նաև Վճռաբեկ դատարանի վարչական պալատի դատավորի թափուր տեղի համար հայտարարված մրցույթում։ Այստեղ արդարադատության նախկին նախարար Արտակ Զեյնալյանի, Վարչական դատարանի նախագահ Հրաչ Այվազյանի ու Վերաքննիչ վարչական դատարանի դատավոր Լիանա Հակոբյանի միջև ընտրեցին Հակոբյանին, դարձյալ միաձայն` 68 ձայնով։ Մյուս երկու թեկնածուները 0 ձայն ստացան։
Վճռաբեկ դատարանի վարչական պալատի դատավորի մյուս երկու թափուր տեղերի համար նույն կերպ ընտրվեցին վարչական դատարանի դատավոր Արծրուն Միրզոյանն ու Վերաքննիչ վարչական դատարանի դատավոր Քրիստինե Մկոյանը։
Հիշեցնենք` հունիսի 27–ին այս հարցրով Ազգային ժողովն արտահերթ նիստ էր հրավիրել, որն ավարտվեց այսօր կեսօրից հետո` փակ գաղտնի քվեարկությունների արդյունքների հրապարակմամբ։ Նիստին ներկա էր միայն «Քաղաքացիական պայմանագիրը»։ Ընդդիմադիր երկու խմբակցությունները արտահերթ նիստին չեն մասնակցել։