ԵՐԵՎԱՆ, 28 հունիսի – Sputnik. Հայաստանը տնտեսական հետագա հնարավոր բարդություններիից խուսափելու համար պետք է հարկային եկամուտների ավելցուկը կուտակի։ Այս մասին ասվում է ԱՄՀ մոնիթորինգային առաքելության հայտարարության մեջ, որի անդամները Հայաստանում էին 2022թ. հունիսի 20–24–ը։
Հայաստանի տնտեսական ակտիվությունը 2022 թ․ առաջին չորս ամսում (նախորդ տարվա նույն ժամանակահատվածի համեմատ) աճել է 9․4 տոկոսով։ 2022 թ․ ՀՆԱ-ի աճն ակնկալվում է, որ կհասնի 5 տոկոսի, իսկ գնաճը կանխատեսվում է, որ ժամանակավորապես կբարձրանա՝ նախքան տարեվերջին մեղմանալը։
Ուկրաինայում պատերազմի ազդեցությունը երկրում իրավիճակի վրա այնքան էլ բացասական չի անդրադարձել, ինչպես ենթադրվում էր։ Միևնույն ժամանակ, տարածաշրջանում առկա իրավիճակը մնում է ծայրահեղ անորոշ։ Այդ պատճառով ԱՄՀ-ում Հայաստանի իշխանություններին խորհուրդ են տալիս արտապլանային եկամուտները կուտակել։
2022 թվականի հունվարից մինչև հունիս Հայաստանի կառավարությանը հաջողվել է պլանավորվածից 100 մլն ԱՄՆ դոլար ավելի հարկ հավաքել` 911 մլրդ դրամ (մոտ 2 մլրդ 170 մլն դոլար)։
Իշխանությունների հետ քննարկումների ընթացքում անդրադարձ է կատարվել վերջին զարգացումներին, տնտեսական հեռանկարին և իշխանությունների քաղաքականության առաջնահերթություններին, որոնք կարող են ԱՄՀ-ի օժանդակության ապագա ծրագրի հիմքում լինել։
«Անհրաժեշտ է զարգացնել կապիտալի շուկաները, թվային տնտեսությունն ու պետական ապարատի բարեփոխումները, զարգացնել պետություն-մասնավոր հատված նախագծերը»,– ասված է ԱՄՀ առաքելության հայտարարության մեջ:
ԱՄՀ աջակցությամբ նոր ծրագրի շուրջ քննարկումներն ակնկալվում է սկսել սեպտեմբերին։
Հիշեցնենք` ՀՀ արտաքին արժութային պահուստները 2021 թվականի դեկտեմբերին կազմել են մոտ 3.2 մլրդ ԱՄՆ դոլար, 2022-ի մարտին` 2.9 մլրդ, իսկ ապրիլին` 3 մլրդ 18 մլն ԱՄՆ դոլար։