ԵՐԵՎԱՆ, 27 հունիսի – Sputnik. Ռուսաստանի պաշտպանության նախարարության փոխանցմամբ՝ ԼԺՀ-ում, Լիսիչանսկից ոչ հեռու, ոչնչացվել են «վրացական լեգեոնի» օտարերկրյա վարձկանները, որոնք մասնակցել են ռուս զինվորների խոշտանգումներին և դաժան սպանություններին:
Նույն՝ Լիսիչանսկի ուղղությամբ ոչնչացվել է ՌԴ-ում արգելված ուկրաինական «Աջ սեկտորի» գրոհայիններից կազմված «պատնեշային ջոկատը», որը պետք է հետ պահեր դիրքերից փախչող ուկրաինացի զինվորներին։
Մեկ օրվա ընթացքում ռուսական ավիացիան ոչնչացրել է Ուկրայինայի երեք «Գրադ» ՀԿՌՀ-ի դասակ, М777 155 մմ-անոց հաուբիցի մեկ դասակ, երկու «Հիացինտ» 152 մմ-անոց հաուբիցի հրետանային դասակ, ինչպես նաև 2С1 «Գվոզդիկա» ինքնագնաց հրետանային կայանքների երկու դասակ, որոնք գնդակոծում էին Դոնեցկը և ԴԺՀ-ի այլ քաղաքներ, հայտնել են Ռուսաստանի պաշտպանության նախարարությունում:
Բացի այդ, ռուսական պաշտպանական գերատեսչության հաղորդագրության համաձայն, մեկ օրում Ռուսաստանի բանակը ոչնչացրել է ուկրաինական զորքերի կառավարման 24 կետ: Ուկրաինական զորքերն ամբողջ ընթացքում կորցրել են ավելի քան 50 հազար մարդ՝ ճակատի ամբողջ գծով, ևս ավելի քան 150 հազար մարդ կարող էր վիրավորվել, հայտարարել է Դոնեցկի Ժողովրդական Հանրապետության տեղեկատվության նախարարի առաջին տեղակալ Դանիիլ Բեզսոնովը:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 124-րդ օրը։