ԵՐԵՎԱՆ, 27 հունիսի – Sputnik. Հայաստանը չի խուսափում սահմանազատման և սահմանագծման գործընթացին մասնակցելուց։ Այս մասին առցանց ասուլիսում հայտնեց ՀՀ վարչապետ Նիկոլ Փաշինյանը։
Նշենք, որ վերջին շրջանում Ադրբեջանի ներկայացուցիչները փորձ են անում տպավորություն ստեղծել, թե ՀՀ-ն փորձում է հետաձգել Սահմանազատման և սահմանային անվտանգության հարցերով հանձնաժողովի աշխատանքը։
«Նախորդ հանդիպմանը, որը տեղի ունեցավ Հայաստան-Ադրբեջան սահմանին, համատեղ որոշում է կայացվել, որ հաջորդ հանդիպումը տեղի կունենա Մոսկվայում առնվազն 1 ամիս անց։ Ընդգծում եմ` համատեղ որոշում է եղել։ Կողմերն արձանագրել են, որ կա որոշակի աշխատանք, որը 1 ամսից շուտ հնարավոր չի լինի անել։ Մայիս ամսին էլ ՀՀ-ն 2 անգամ պատրաստակամություն է հայտնել։ Նույնիսկ նախնական պայմանավորվածություն է եղել մեկնարկել Սահմանազատման և սահմանային անվտանգության հարցերով համատեղ հանձնաժողովի նիստը։ Երկու անգամ Ադրբեջանի կողմից չեղարկվել կամ հետաձգվել է այդ հանդիպումը»,- նշեց Փաշինյանը։
Նրա խոսքով` Ադրբեջանի և Թուրքիայի հետ հարաբերություններում խաղաղության օրակարգն այլընտրանք չունի։ Վարչապետը նշեց, որ Ադրբեջանը հրաժարվում է տարբեր թեմաներով խոսակցության գնալ` Հայաստանին մեղադրելով խոսակցությունից հրաժարվելու մեջ։ Ըստ Փաշինյանի, Ադրբեջանը նման քայլերով կաթիլ-կաթիլ փորձում է նոր պատերազմի լեգիտիմություն կուտակել Հայաստանի դեմ։
Անդրադառնալով ավտոճանապարհների հաղորդակցության հարցին, վարչապետն ընդգծեց, որ նույն իրավիճակն էլ այս պարագայում է։
«Իրականությունը լրիվ այլ է։ Կա մի ճշմարտություն` Ադրբեջանը վերջին 30-31 տարում վարել է Հայաստանը շրջափակելու քաղաքականություն։ Իրականում Ադրբեջանն է ձգձգում պրոցեսը, որովհետև նա մտածել է, որ ՀՀ-ն շրջափակելու քաղաքականությունն էֆեկտիվ է, կամ առնվազն չարժե հիմա որոշումներ կայացնել, որպեսզի շրջափակումը հաղթահարվի»,- ընդգծեց Փաշինյանը։
Նրա խոսքով` հաղորդակցման բացման արդյունքում, ըստ պայմանավորվածությունների, Հայաստանը պետք է երկաթուղային կապ ստանա Իրանի Իսլամական Հանրապետության, Ռուսաստանի Դաշնության, ինչպես նաև Սյունիքի մարզից ՀՀ մյուս հատվածների հետ, քանի որ այդ երկաթուղին անցնում է Նախիջևանով։ ՀՀ-ն նաև այլընտրանքային ավտոմոբիլային ճանապարհ պետք է ստանա Երասխ-Մեղրի ուղղությամբ։
Փաշինյանը հայտնեց, որ հայկական կողմը վերին աստիճանի շահագրգիռ է այդ պրոցեսն առաջ տանելու մեջ, սակայն Ադրբեջանը փորձում է հարցը լուծել այնպես, որպեսզի Հայաստանը մնա շրջափակման մեջ, ինչը չի բխում 2020 թ. նոյեմբերի 9-ի եռակողմ հայտարարությունից։