ՀՀ ԱԺ «Պատիվ ունեմ» խմբակցության ղեկավար Արթուր Վանեցյանի որոշումը նշանակում է, որ նա հավատարիմ մնաց իր խոստմանը, քանի որ նախապես հայտարարել էր` եթե ձախողվի պայքարի այն փուլը, որը պետք է բերի Նիկոլ Փաշինյանի հրաժարականին, ապա ինքն այլևս անելիք չի ունենա խորհրդարանում։ Sputnik Արմենիայի հետ զրույցում այս տեսակետը հայտնեց քաղաքագետ Սուրեն Սուրենյանցը։
Նշենք, որ ՀՀ ԱԺ «Պատիվ ունեմ» խմբակցության ղեկավար Արթուր Վանեցյանը հունիսի 21-ին հայտարարեց, որ վայր է դնում պատգամավորական մանդատը։
«Պարոն Վանեցյանն իր որոշմամբ նաև սահմանազատվեց նախկին իշխանությունն ամբողջացնող քաղաքական ուժերից, որովհետև շատ ավելի կարևոր է նրա հայտարարության երկրորդ մասը, որով նա ըստ էության չեղարկում է «Պատիվ ունեմ» դաշինքի գոյությունը` իրեն դուրս դնելով քաղաքական ուժերի խճանկարից»,– պարզաբանեց քաղաքագետը։
Սուրենյանցի կարծիքով` վերոհիշյալ քայլից հետո կերևա, թե երկու ընդդիմադիր խորհրդարանական խմբակցությունների մյուս պատգամավորները որքանով են սկզբունքային, և եթե նրանք մնան Ազգային ժողովում, ապա կընդունեն, որ իրենց պայքարը ձախողվել է, իսկ եթե ուզում են իսկապես քաղաքական ճգնաժամ հարուցել, ապա պետք է հետևեն Վանեցյանի օրինակին և ամբողջ ցուցակով հրաժարվեն մանդատներից։
«Հիմա գնդակն ընդդիմության դաշտում է, ստեղծվել է նոր իրավիճակ։ Ընդդիմադիր ճամբարում կային հակասություններ, և ընդդիմության շարժման ձախողումից հետո այդ ճակատում տեղի են ունենալու վերակազմավորումներ։ Եթե քաղաքական ճգնաժամ գեներացվի, ապա այդ գործընթացն անպայման կավարտվի արտահերթ ընտրություններով։ Որոշումն իրենցն է»,– ասաց քաղաքագետը։
Սուրենյանցի համոզմամբ` խորհրդարանական երկու ընդդիմադիր դաշինքներն իրավիճակային էին, ընդամենը ԱԺ–ում մուտք ապահովելու համար, սակայն նոր իրավիճակում չի բացառվում, որ ենթարկվեն որոշակի ցնցումների։
Նշենք, որ «Հայրենիք» կուսակցության խորհուրդը որոշում է կայացրել շարունակել գործունեությունը խորհրդարանից դուրս։ Այսպիսով` դադարում է գոյություն ունենալ ՀՀԿ-ի հետ ձևավորած «Պատիվ ունեմ» դաշինքը։
Հիշեցնենք, որ «թավշյա հեղափոխությունից» հետո` 2018-ի մայիսի 10-ին, Արթուր Վանեցյանը նշանակվեց ՀՀ ԱԱԾ տնօրեն։ 2019-ի սեպտեմբերի 16-ին, սակայն, ՀՀ վարչապետ Նիկոլ Փաշինյանի հետ ունեցած տարաձայնությունների հետևանքով նա ազատվեց զբաղեցրած պաշտոնից։
Դրանից հետո Վանեցյանը ձևավորեց «Հայրենիք» կուսակցությունը, ապա ՀՀԿ-ի հետ 2021-ին «Պատիվ ունեմ» դաշինքնով մասնակցեց ՀՀ ԱԺ արտահերթ ընտրություններին։ «Պատիվ ունեմ» դաշինքը խորհրդարանում ստացավ 7 մանդատ։
2022-ի ապրիլի 17-ից Արթուր Վանեցյանը հայտարարեց անժամկետ բողոքի ակցիաներ սկսելու մասին` գործող իշխանությանը հեռացնելու պահանջով։