ԵՐԵՎԱՆ, 20 հունիսի – Sputnik. Մաշտոց-Սայաթ-Նովա պողոտաների խաչմերուկից մեկնարկեց «Դիմադրություն» շարժման հերթական երթը։ Նախատեսվում է, որ այսօր նրանք 3 կառույցների մոտ են կանգ առնելու` «Քաղաքացիական պայմանագիր» կուսակցության գլխավոր գրասենյակի, Ոստիկանության և Ազգային անվտանգության ծառայության։
Կուսակցության գրասենյակի մոտ ոստիկանական ուժեր են կենտրոնացված։
Ընդդիմության երթը Երևանում
© Sputnik / Asatur Yesayants
«Այս իշխանության օրոք մենք տեսել ենք համաճարակ, հազարավոր մահեր, պատերազմ, հազարավոր նահատակներ, տեսել ենք նաև այն սոցիալական բեռը, որն ամեն օր ծանրանում է մեր հայրենակիցների ուսերին։ Այսօր ՔՊ-ական իշխանությունը «բեսպրեդել» է սերմանում ամբողջ երկրում։ Ամեն օր սպանություններ են, կրակահերթեր են, հարուցվող քրեական գործեր»,- երթի ընթացքում նշեց շարժման անդամ, «Հայաստան» խմբակցության պատգամավոր Գեղամ Մանուկյանը։
Շարժման անդամներն ու նրանց կողմնակիցներն իրենց ձեռքերում պաստառներ են պահում, որոնց վրա գրված է «Նիկոլ=մահ», «Կանգնեցրե՛ք ահաբեկչությունը», «Կանգնեցրե՛ք մարդասպանին», «Նիկոլիզմի զոհ ենք, բոլորս», «Նիկոլ մահաբեր» և այլն։
Նրանք նաև վանկարկում են` «Առանց Նիկոլ, Հայաստան», «Նիկո՛լ, մարդասպա՛ն», «Նիկո՛լ, հայասպա՛ն»։
Նշենք, որ «Դիմադրություն» շարժումն այսօր հրատապ հանրահավաք է անցկացնում։