ԵՐԵՎԱՆ, 17 հունիսի – Sputnik. Ռուսաստանի արտգործնախարար Սերգեյ Լավրովն ու Ադրբեջանի արտգործնախարար Ջեյհուն Բայրամովը քննարկել են Բաքվի և Երևանի միջև հարաբերությունների կարգավորման հարցը։ Տեղեկությունը հայտնում է Ռուսաստանի արտաքին քաղաքական գերատեսչությունը։
«Ռուսաստանի և Ադրբեջանի արտգործնախարարները հեռախոսով քննարկել են Մոսկվայի միջնորդությամբ Երևանի և Բաքվի միջև հարաբերությունների կարգավորման գործընթացը»,–ասված է հաղորդագրության մեջ։
Կողմերն ընդգծել են 2020 թ. նոյեմբերի 9-ին, 2021 թ. հունվարի 11-ին և նոյեմբերի 26-ին Ռուսաստանի, Հայաստանի և Ադրբեջանի ղեկավարների ընդունած եռակողմ հայտարարությունների կատարմանն ուղղված համապատասխան աշխատանքի իրականացման կարևորությունը։
Զրուցակիցները պայմանավորվել են շարունակել այդ հարցերի առարկայական քննարկումը Լավրովի` Բաքու կատարելիք աշխատանքային այցի ընթացքում:
ՌԴ արտգործնախարարն Ադրբեջանում է լինելու հունիսի 23-24-ին։